मारियो पिरीस 

पणजी: तियात्र क्षेत्राची आजची परिस्थिती फार निराशाजनक आहे. प्रेक्षकांच्या संख्येत कमालीची घट झालेली आहे व त्यामुळे अनेक दिग्दर्शक आणि अभिनेते निराश बनले आहेत. त्याचबरोबर असंख्य नवोदित तियात्र लेखक-दिग्दर्शक आपले कौशल्य रंगमंचावर प्रदर्शित करण्यास उत्सुक आहेत. या नवीन त्या तियात्रीस्टांनी आपला ठसा उमटवण्याच्या‌ आशेने मोठ्या कलाकारांसह आपली निर्मिती केली आहे परंतु प्रेक्षकांच्या अल्प प्रतिसादामुळे त्यांनाही आर्थिक नुकसान भोगावे लागले आहे. या परिस्थितीवर उपाय काय? 

तियात्र सादरीकरणाव्यतिरिक्त आज शहरातील सभागृहांमध्ये आणि खेड्यांमध्येही अनेक संगीत कार्यक्रमाचे आयोजन होत असते आणि या संगीत कार्यक्रमात प्रेक्षकांना आकर्षित करण्यासाठी आयोजकांनी एका अभिनव कल्पनेचा वापर केला आहे.

ही कल्पना म्हणजे 'हाऊसी' खेळ! कार्यक्रमाच्या मध्यंतरात हा खेळ खेळला जातो ज्यातून उपस्थित प्रेक्षकांना लाखो रुपये जिंकण्याची संधीही मिळते. त्यामुळे या कार्यक्रमाला प्रेक्षकांचा प्रचंड प्रतिसाद मिळत आला आहे. अनेक प्रेक्षक तर केवळ बक्षीस जिंकण्याच्या आशेने या कार्यक्रमाला उपस्थित राहताना दिसतात. अलीकडेच दक्षिण गोव्यातील अशा एका कार्यक्रमाला प्रेक्षकांची मोठी गर्दी उसळली होती.

आता प्रश्न हा आहे की ही हाउसी खेळाची कल्पना तियात्रासाठी वापरली जाऊ शकते काय? त्यातून तियात्राला प्रेक्षकांचा उत्साही प्रतिसाद मिळू शकेल काय? हाऊसीमुळे संगीत कार्यक्रमांसाठी प्रेक्षकांची प्रचंड गर्दी अनुभवलेल्या एका व्यक्तीचे मत आहे की तियात्र कलाकारांनी घेतलेल्या प्रचंड मेहनतीनंतर, प्रेक्षकांच्या कमी उपस्थितीला सामोरे जाणे हे त्या कलाकारांसाठी निराशाजनक असते.

मात्र तियात्राच्या मध्यंतरात हाऊसी खेळाचा अवलंब केला गेला तर प्रेक्षकांना मोठ्या संख्येने आकर्षित करण्यात त्याचा नक्कीच फायदा होईल. असेच मत आणखी एका तियात्र शौकिनानेही व्यक्त केले; ज्याप्रमाणे संगीत कार्यक्रमांना हाऊजी मुळे प्रेक्षक मिळतो तसाच तियात्राना‌ का मिळू नये? 

आज प्रेक्षकांविना तियात्रांचे जे नुकसान होत आहे ते थांबवण्यासाठी कदाचित हाऊसीचा प्रयोग योग्य ठरू शकेल काय आणि तो प्रेक्षकांना तियात्रांकडे पुन्हा घेऊन येऊ शकेल काय? जर तसे झाले तर दिग्दर्शक आणि कलाकारांना फायदा होण्याबरोबरच तियात्र क्षेत्रालाही नक्कीच संजीवनी मिळेल.