Kone Priol Accident

फोंडा: कोने-प्रियोळ मुख्य रस्त्यावर आज गुरुवारी तीन कारगाड्यांच्या टकरीत सातजण जखमी झाले. हा अपघात दुपारी ३.४५ वा.च्या सुमारास घडला.

जीए ०४ एच ०५२६ या क्रमांकाच्या कारने फोंड्याच्या दिशेने जाताना ओव्हरटेक करण्याच्या नादात समोरून येणाऱ्या एम एच ०८ एएक्स २४३१ या क्रमांकाच्या महाराष्ट्रातील कारला व पुढे जाऊन जीए ०३ व्ही ०६२६ या क्रमांकाच्या आणखी एका कारला धडकली.

या अपघातात रत्नागिरी येथून देवदर्शनासाठी गोव्यात आलेले निनाद तेंडुलकर, प्रिया तेंडुलकर यांच्यासह सात वर्षीय श्रीरंग तेंडुलकर तसेच गोव्यातील वैभव साखळकर, विद्या साखळकर, विनायक साखळकर आणि अपघाताला कारणीभूत कारचा चालक गोकुळदास नाईक हाही जखमी झाला. जखमींना फोंड्यातील आयडी उपजिल्हा इस्पितळात उपचारासाठी दाखल करण्यात आले. सर्वांची प्रकृती ठीक असल्याची माहिती देण्यात आली. म्हार्दोळ पोलिसांनी अपघाताचा पंचनामा केला. पोलिस अधिक तपास करीत आहेत.