Goa Accident: रस्ता ओलांडताना दुचाकीची धडक, ख्रिसमसला कुटुंबावर कोसळला दु:खाचा डोंगर

नुवे: कार्मेल महाविद्यालयाजवळ असलेल्या आगना चॅपेलसमोर एका दुचकीन धडक दिल्याने पादचारी महिलेचा दुर्दैवी मृत्यू झाला. फातिमा इलारिओ असे या मयत महिलेचे नाव असून कुडतरी पोलिसांनी दुचाकीचालक संशयित आशिष पटेल याच्या विरुद्ध गुन्हा दाखल केला आहे. दुचाकी चालक वेगाने गाडी चालवत होता, त्यामुळे हा अपघात झाल्याचे पोलिसांनी म्हटले आहे.

२५ डिसेंबर म्हणजेच नाताळच्या दिवशी रात्री सव्वा आठ वाजताच्या सुमारास ही घटना घडली. आके मडगाव येथील रहिवासी आशिष पटेल हा त्याच्या दुचाकीसह भरधाव वेगाने मडगावच्या दिशेने येत होता आणि याचवेळी मयत फातिमा इलारिओ या रस्ता ओलांडत होत्या.

गाडीची जबर धडक बसल्याने वयस्क महिला गंभीर जखमी झाली व तिला उपचारांसाठी दक्षिण गोवा जिल्हा हॉस्पिटलमध्ये दाखल करण्यात आलं. हॉस्पिटलमध्ये उपचार घेत असतानाच या वयस्क महिलेचा मृत्यू झाला. डोक्यातून रक्तस्त्राव झाल्याने तसेच, मणक्याला इजा झाल्याने महिलेचा मृत्यू झाल्याचे शवविच्छेदन अहवालात म्हटले आहे.

मायना कुडतरी पोलिसानी पंचनामा केल्यानंतर संशयित आरोपी आशिष पटेल याच्यानावे गुन्हा दाखल करण्यात आला आहे. या अपघाताचा पुढील तपास मायना कुडतरी पोलीस निरीक्षक अरुण गावस देसाई यांच्या मार्गदर्शनाखाली महिला पोलीस उपनिरीक्षक सोनल गावकर करीत आहेत.