वास्को: राज्य सरकारच्या तीन सिलिंडर योजनेचा आतापर्यंत ५० हजार कार्डधारकांना लाभ मिळाला असून, सुमारे दीड लाख लाभार्थ्यांनी योजनेसाठी अर्ज केले आहेत. मात्र, यातील तब्बल ४० हजार अर्ज पतींच्या नावाने दाखल झाले आहेत. त्यामुळे महिलांनी योजनेचा लाभ घेण्यासाठी अर्ज आपल्या नावाने करावा, असे आवाहन मुख्यमंत्री डॉ. प्रमोद सावंत यांनी केले.

मुरगाव येथील रवींद्र भवन येथे आयोजित कार्यक्रमात ते बोलत होते. यावेळी भाजप प्रदेशाध्यक्ष दामोदर (दामू) नाईक, राज्यसभा खासदार सदानंद शेट तानावडे, वाहतूकमंत्री माविन गुदिन्हो, मुरगावचे आमदार संकल्प आमोणकर, वास्कोचे आमदार दाजी साळकर यांच्यासह अन्य मान्यवर उपस्थित होते.

आगामी विधानसभा निवडणुकीपूर्वी महिलांना वाढीव गृहआधार देण्यात येईल, अशी घोषणा सावंत यांनी पुन्हा केली. सरकारने दिलेला शब्द पाळला जाईल, असेही त्यांनी सांगितले. तसेच, निवडणुकीच्या काळात विविध राजकीय पक्षांकडून जाहीरनामे प्रसिद्ध केले जातील; नागरिकांनी आश्वासनांची पडताळणी करून निर्णय घ्यावा, असे आवाहन त्यांनी केले. वाहतूक मंत्री माविन गुदिन्हो यांनी उज्ज्वला योजना गरजूंपर्यंत पोहोचविण्याचे काम सरकारने केल्याचे सांगितले. दामू नाईक यांनीही सरकारच्या विविध योजनांचा उल्लेख केला.

‘ज्यांनी गोव्याची वाट लावली, ते यात्रा काढत आहेत’

काँग्रेसच्या ‘गोवा राखण’ यात्रेवर मुख्यमंत्री डॉ. प्रमोद सावंत यांनी टीका केली. गोव्याचे रक्षण करण्यासाठी भाजप सरकार सक्षम असल्याचा दावा त्यांनी केला. सरकारने दिलेली आश्वासने पूर्ण केली असून, आगामी काळात विरोधकांकडून खोटी आश्वासने दिली जाऊ शकतात, असा इशाराही त्यांनी दिला. ‘जाहीरनामे वाचताना सावध राहा,’ असे आवाहन करत भाजप सरकार पुन्हा सत्तेवर येईल, असा विश्वास सावंत यांनी व्यक्त केला.

महिलांचा सन्मान आणि त्यांचे सक्षमीकरण हे सरकारचे प्राधान्य असल्याचे सावंत यांनी नमूद केले. मुलींच्या विवाहासाठी आतापर्यंत सरकारने ९५० कोटी रुपये दिल्याचाही दावा मुख्यमंत्र्यांनी केला.