Goa Mine खाण व्‍यवसाय पावसानंतर तातडीने सुरू करावा. तसेच स्‍थानिक ट्रकमालकांच्‍या हिताचा विचार करून सरकारने 15 वर्षांच्या कालावधीनंतर वाहने स्क्रॅप करण्याच्या नियमातून सूट द्यावी, अशी मागणी करण्‍यात आली आहे.

खाण व्यवसायासाठी मये गाव अग्रेसर असून गोव्यातील जास्त खाणकाम मये, पैरा, शिरगाव, पिळगाव तसेच सभोवतालच्या भागातून चालत होते. मयेतील संपूर्ण जनता गेल्या काही वर्षांत खाण व्यवसायावरच अवलंबून होती, असे म्हटल्यास वावगे नाही.

परंतु खाणबंदीनंतर खाण अवलंबितांवर जणू संक्रातच ओढवली. खाण कामगार, ट्रकमालकांचे जीवन फक्त खाण व्यवसायावरच अवलंबून होते. परंतु या लोकांवर अक्षरशः उपासमारीचीच पाळी आली असून कसेबसे दिवस ढकलत आहेत.

यातून सुटकेसाठी सरकारने तातडीने खाणी सुरू कराव्यात अथवा त्यांचा उदरनिर्वाह चालण्यासाठी अन्य उपाययोजना करावी, अशी जोरदार मागणी खाण अवलंबितांनी केली आहे. ट्रकमालकांनी सांगितले की, खाणकाम बंद झाल्यापासून त्यांना आर्थिक कोंडीचा सामना करावा लागत आहे.

उत्पन्नाचे साधन नाही : ट्रकमालक सुभाष किनळकर

1 सरकारने त्यांना १५ वर्षांच्या कालावधीनंतर वाहने स्क्रॅप करण्याच्या नियमातून सूट दिली पाहिजे; कारण खाणकाम बंद झाल्यानंतर १० वर्षे आधीच वाया गेली आहेत.

2 सप्टेंबर २०१२ मध्ये खाणकाम बंद केले होते. त्यानंतर ट्रक वाहतूक पूर्णपणे बंद आहे. परिणामी उत्पन्नाचे कोणतेही साधन नसल्याने ट्रकमालक आर्थिक संकटात सापडले आहेत.

म्हणून आम्ही राज्य सरकारला पुढील १० वर्षांच्या कालावधीसाठी वाहने स्क्रॅप करण्याच्या नियमातून सूट देण्याची विनंती करत आहोत.

3 सध्या ट्रक निष्क्रिय स्थितीत आहेत. ते दुरुस्त करण्यासाठी ट्रकमालकांनी सरकारला त्यांच्यासाठी कर्जाची एक विशेष योजना तयार करण्याची विनंती केली.

ज्यामध्ये ते त्यांचे ट्रक दुरुस्त करू शकतील व खाणकाम पुन्हा सुरू झाल्यावर त्यांना वाहतुकीसाठी ट्रक तयार ठेवण्यास अवधी मिळेल.

खाणव्यवसाय बंद झाल्यानंतर बहुतेक कामगारांना आपला दैनंदिन उदरनिर्वाह चालण्यासाठी सर्व सोन्याचे दागिने बँकेत तारण ठेवावे लागले. मात्र, आता तीव्र आर्थिक कोंडीमुळे दागिने सोडविणे अत्यंत कठीण झाले आहे आणि बँकाही थांबण्यास तयार नाहीत.

आमच्या जास्तीत जास्त सोन्याच्या दागिन्यांचा लिलाव केलेला आहे, त्यामुळे खाणी लवकरात लवकर सुरू कराव्यात. - गोविंद लावणीस, कामगार