Theft in Goa: कोलवा येथील एका रिसॉर्टमधून आठ लाखांची रोकड घेऊन पळ काढलेल्‍या संशयिताला अवघ्‍या काही तासांतच दिल्‍ली विमानतळावर जेरबंद करण्‍यात आले. दिग्‍विजय सिंग (२२) असे त्याचे नाव असून तो उत्तर प्रदेशातील लखनौ येथील असल्याची माहिती कोलवा पोलीसांनी दिली. त्‍याला पकडल्‍यानंतर पोलिसांना त्‍याच्‍याकडे 7.5 लाख रुपयांची रोख सापडली. आज त्‍याला गोव्‍यात आणण्‍यात आले.

संशयिताला ताब्‍यात घेण्‍यासाठी कोलवा पोलिस ठाण्‍याचे एक पथक दिल्‍लीला रवाना झाले हाेते. या प्रकरणात जाॅन डिसौझा हे तक्रारदार आहेत. संशयित प्रशिक्षणार्थी म्‍हणून कोलवा येथील कृष्‍णा बीच रिसोर्ट येथे कामाला होता. पहाटे त्‍याने मालकाला भाऊ आजारी असल्‍याने घरी जायचे आहे पगार द्या, असे सांगितले होते. काही वेळ थांब पगार देतो, असे त्‍याला सांगण्‍यात आले होते.

अन्‌ संशयित पोलिसांच्या हाती

संशयित प्रथम दाबोळी विमानतळावर गेला. मात्र, विमान चुकल्‍यानंतर तो टॅक्‍सीने कळंगुट येथे एका हॉटेलवर गेला. पोलिसांनी तिथे चौकशी केली असता, तो तेथून ‘मोपा’वरून दिल्लीला गेल्‍याचे समजले. त्यानंतर दिल्‍ली पोलिसांना सतर्क केले. संशयित दिल्‍ली विमानतळावर पोहोचताच त्‍याला जेरबंद केले.