Goa Crime News: शुक्रवारी (ता.१) रुमडामळ येथे खून करण्यात आलेला सादिक बेळ्ळारी हा एका खून प्रकरणात तुरुंगात होता. दोन महिन्यांपूर्वी तो जामिनावर सुटला होता. याच खुनाचा बदला घेण्यासाठी त्याचा खून करण्यात आला असावा, असा प्राथमिक कयास आहे.

या खुनात दाेघांचा हात असल्‍याचा पोलिसांना संशय असून हे संशयित कर्नाटकात पळून गेल्‍याची शक्‍यता असल्‍याने पोलिसांचे एक पथक कर्नाटककडे रवाना झाले होते. २०२० साली याच भागातील युवक मुजाहीद खान याचा खून झाला होता. या प्रकरणात सादिकला अटक झाली होती. याच खुनाचा बदला घेण्‍यासाठी हे हत्‍याकांड झाल्याचा संशय आहे. हे मारेकरी मुजाहीदचे जवळचे नातेवाईक असल्‍याची माहिती पोलिसांना मिळाली आहे.

गेल्या चार दिवसांत तीन खुनांची प्रकरणे नोंद झाली असताना शुक्रवारी सकाळी रुमडामळ हाऊसिंग बोर्ड परिसरातील चौथ्या घटनेने भर घातली.

सादिकची आई व वडील सकाळी ८.३० वाजता कामानिमित्त घराबाहेर पडले होते. त्यानंतर ९.१५ वाजण्याच्या सुमारास घरात कुणीही नसल्याची संधी साधत झोपलेल्या सादिकवर संशयितांनी धारदार शस्त्रांनी वार केले. त्याच्या मानेवर व शरीरावर वार केल्याच्या खुणा आहेत.

सादिकला दिली होती धमकी

न्यायालयातील एका सुनावणीला जात असताना दोघांकडून मारण्याची धमकी मिळाल्याची तक्रार सादिक याने फातोर्डा पोलिसांत केली होती. त्यामुळे मुजाहीद याच्या खुनाचा बदला घेण्यासाठीच सादिकचा खून करण्यात आला असावा, असा संशय व्यक्त केला जात आहे.