मडगाव: पत्नीचा खुनाचा प्रयत्न केल्याच्या आरोपातून वगळण्याची संशयित अहमद शेख याचा अर्ज दक्षिण गोवा जिल्हा सत्र न्यायालयाने फेटाळून लावला.

फेब्रुवारी २०२१ साली रावणफोंड येथे अहमद शेख याने आपली पत्नी साजिदा हिच्यावर लोखंडी दांड्याने मारहाण केल्याचा आरोप आहे. दोघेही पती पत्नी भाटले, पणजी येथे राहत होती. अहमद हा व्यवसायाने टॅक्सी चालक आहे. त्याला जुगार खेळण्याचा नाद लागला होता.

त्याला कंटाळून साजिदा कायमची मडगावात राहण्यासाठी आली होती. तिचा शोध घेत तो मडगावला आला असता, रावणफोंड येथे ती दुचाकीवरून नावेलीच्या दिशेने जात असताना अहमदला दिसली. तिला वाटेत अडवून त्याने तिच्यावर लोखंडी दांड्याने हल्ला केला. यात साजिदा गंभीर जखमी झाल्या होत्या.

मागाहून या प्रकरणी मडगाव पोलिसांनी संशयित अहमद याच्याविरोधात बेकायदा अडवणे, मारण्याची धमकी देणे, शस्त्राने दुखापत करणे व खुनाचा प्रयत्न करणे अशा कलमांखाली गुन्हा नोंद केला होता. त्यानंतर न्यायालयात आरोपपत्रही दाखल केले होते. सध्या न्यायालयात या खटल्याची सुनावणी सुरू आहे.

आतापर्यंतच्या सुनावणीत पीडितेचा जबाब, सादर करण्यात आलेले पुरावे व पोलिसांनी दाखल केलेले आरोपपत्र यांचा विचार करत संशयिताविरोधात कोणताही गुन्हा नाही, असे म्हणता येणार नाही, असे निरिक्षण नोंदवून संशयिताचा अर्ज न्यायालयाने नामंजूर केला.