Sunburn festival traffic parking arrangement

पेडणे: सुकेकुळण-धारगळ येथे भरलेल्या सनबर्न महोत्सवावेळी वाहतूक व पार्किंग व्यवस्थेचे योग्य नियोजन वाहतूक पोलिसांनी केल्याने महामार्ग तसेच अंतर्गत रस्त्यांवरील वाहतुकीस कोणताही अडसर आला नाही. यासाठी वाहतूक पोलिस अधिक्षक प्रबोध शिरवइकर, सुदेश नार्वेकर व पेडणेचे वाहतूक पोलिस निरीक्षक विश्वजीत चोडणकर यांच्या मार्गदर्शनाखाली सुमारे दीडशे वाहतूक पोलिसांनी तीन दिवस यासाठी विशेष परिश्रम घेतले. त्यामुळे येथील वाहतुकीस कोणतीही अडचण आली नाही.

यापूर्वी आयोजित केलेल्या सनबर्न महोत्सवास ६० ते ७० हजार लोकांनी उपस्थिती लावली होती. धारगळ प्रथमच भरवण्यात आलेल्या या महोत्सवाला नेमके किती लोक येणार याचा कोणताही अंदाज आयोजक तसेच पोलिसांना नव्हता. महोत्सवास येणाऱ्या लोकांची संख्या वाढल्यास येथील रस्ता वाहतुकीवर ताण येण्याची शक्यता होती. विशेषत: महामार्गावरील वाहतूक तसेच मोपा विमानतळावर जाणाऱ्या मार्गावरील वाहतुकीस अडचण होण्याची शक्यता होती. तसेच सर्व्हीस रोडही प्रभावित होण्याची शक्यता होती.

महोत्सव स्थळी सुमारे ५००० हजार वाहनांच्या पार्किंगची सोय करण्यात आली होती. म्हापसा पणजीहून येणाऱ्या वाहनांसाठी पूर्वीची विकास नर्सरी अंडरपास पुलाजवळ व क्रिकेट मैदानावर तसेच सुके कुळण येथील उड्डाणपुलाच्या वाहनांची सोय केली होती.

महामार्गावरील तसेच विमानतळावर जाणाऱ्या वाहनांना अडथळे येऊन नयेत रेडकर इस्पितळाजवळील दुसऱ्या रस्त्यावर जाण्यासाठी असलेला मार्ग बंद करण्यात आला होता. तसेच उड्डाणपुलाच्या खाली असलेल्या सर्विस रोड वरून चांदेल-हसापूर या दिशेने जाणारी वाहतूकही बंद ठेवण्यात

आली होती. तीन दिवस भरलेल्या या महोत्सव स्थळी रोज सुमारे १,७०० चारचाकी तर सुमारे ६,००० दुचाकी वाहने येत होती.