Goa Sunburn: न्यायालयाची अट धुडकारली? पहिल्याच दिवशी सनबर्नचं म्युझिक लाऊड

पेडणे: सनबर्न फेस्टिव्हलमध्ये न्यायालयाने घालून दिलेल्या अटींचे आयोजकांनी काटेकोरपणे पालन न करता आपल्या सोयीनुसार आवाजाची तीव्रता उपलब्ध होईल, अशा प्रकारे ध्वनी मापन यंत्रे बसविल्याचा दावा ग्रामस्थांनी धारगळ येथे सुरू झालेल्या सनबर्न फेस्टिव्हलच्या पहिल्याच दिवशी केला.

शनिवार (दि. २८ डिसेंबर) पासून धारगळ येथे हजारो संगीतप्रेमींच्या उपस्थितीत सनबर्न महोत्सवाला शनिवारी प्रारंभ झाला. महोत्सवासाच्या ठिकाणी न्यायालयाने घालून दिलेल्या अटींचे काटेकोरपणे पालन करण्यात येते की नाही, याचे निरीक्षण करण्यासाठी सनबर्न विरोधकांनी ध्वनी प्रदूषण मंडळाने बसविलेल्या ध्वनी मोजणी यंत्रणांची पाहणी केल्यानंतर हा दावा करण्यात आला आहे.

गेल्या दोन महिन्यांपासून गोव्यात सनबर्न संगीत महोत्सव व्हावा की नाही अशा चर्चा सुरु होत्या. पेडणे तालुक्यातील धारगळ येथे सुरु असलेल्या या संगीत महोत्सवाला स्थानिकांकडून विरोध दर्शविण्यात आला होता, त्यांचा मते अशा संगीत महोत्सवांमुळे प्रदूषण होतं आणि स्थानिकांना त्रास होतो मात्र त्यांनतर न्यायालयाने काही नियम आणि अटी घालून देत सनबर्न या संगीत महोत्सवाला परवानगी देऊ केली होती.

न्यायालयाकडून सनबर्न संगीत महोत्सवाच्या आयोजकांना अमुक एका पातळीच्या वर आवाज जाऊ नये असा आदेश दिला होता मात्र स्थानिकांनी दिलेल्या माहितीनुसार याचे पालन झालेले नाही. सनबर्न संगीत महोत्सवाबद्दल पुढील सुनावणी ७ जानेवारी रोजी होणार आहे.