वास्को: अमितला भेटण्यासाठी आम्हाला पोलिस परवानगी देत नाही. मला माझ्‍या मुलाला निदान दुरून का होईना, एकदा तरी पाहण्याची परवानगी पोलिसांनी द्यावी, अशी विनवणी अमित नाईक याची आई प्रेमा नाईक हिने केली आहे. शांत स्वभावाचा व प्राणिमात्रांवर माया करणारा अमित असे काही करेल यावर माझा मुळीच विश्‍‍वास नाही, असेही रडत रडत तिने सांगितले. विशेष म्‍हणजे रडून रडून त्‍या माऊलीचे डोळे सुजले आहेत.

अमित व त्याच्या भावंडांचे शिक्षण (Education) वास्कोतच झाले आहे. पूर्वी आम्ही भाड्याच्या घरामध्ये राहत होतो. त्यानंतर काटे-बायणा भागात फ्लॅट विकत घेतला. माझा लहान मुलगा अमेरिकेत काम करू लागल्यावर त्याने जयरामनगर-दाबोळी येथे रो बंगला पाहिला व तो पसंत केला. त्यासाठी बॅंकेकडून कर्ज घेतले आहे. ते आम्ही अद्याप फेडत आहोत, असे प्रेमा नाईक यांनी सांगितले.

काहीच माहीत नसताना लोक विविध वावड्या उठवीत आहेत. त्यामुळे आणखी मानसिक त्रास होतो. अमित पोलिसांना शरण आल्यापासून त्याचा व आमचा कोणताही संपर्क झालेला नाही. त्याला भेटता यावे, पाहता यावे म्‍हणून माझा जीव तळमळत आहे. पोलिसांनी निदान एकदा तरी आम्हाला त्याला पाहण्याची परवानगी द्यावी.

- प्रेमा नाईक, अमितची आई

तीन वर्षांपूर्वी माझ्या लहान मुलाचे निधन झाले. त्‍यामुळे आम्‍हाला मोठा मानसिक धक्का बसला. त्यातून पूर्णपणे सावरलो नसतानाच आता हे संकट आले. २०१९ साली रो बंगला विकत घेतला असला तरी त्याचे कर्जाचे हप्ते फेडण्यासाठी आम्हाला चौघांना काम करावे लागते. मी स्वतः टेलरिंग करून काही पैसे कमावते. तर, माझा नवरा अशोक हे मिक्सर, पंखे, इस्त्री दुरुस्ती करण्याचे काम करतात. मुलगी अलीकडेच बंगलोर येथे कामाला गेली आहे. अमितची अर्धी कमाई प्राणिमात्रांवर खर्च होते. त्‍याला पोलिसांनी अटक केल्यापासून आमच्‍या बंगल्याबाबत लोक वावड्या उठवत आहेत, असे प्रेमा नाईक म्‍हणाल्‍या.

मानसिक धक्का; वडिलांवर उपचार सुरू

सिद्दीकी ऊर्फ सुलेमान खान प्रकरण ज्या दिवशी घडले, त्या दिवशी सकाळी दोन पोलिस आमच्या घरी हजर झाले. त्यांनी सर्व घराची तपासणी केली व ते निघून गेले. तेव्हा आम्हाला सदर प्रकरण समजले. त्‍यामुळे अमितच्या वडिलांना मोठा मानसिक धक्का बसला. त्यांना त्‍याच दिवशी उपचारांसाठी इस्‍पितळात नेण्यात आले. आजही ते तपासणीसाठी गोमेकॉत गेले होते, असे प्रेमा नाईक म्हणाल्या.