जमीन बळकाव प्रकरणात गुंतलेला कुविख्यात ठग, गेल्या अनेक दिवसांपासून पोलिसांच्या तावडीतून निसटलेला सुलेमान पुन्हा पोलिसांच्या हाती लागला असल्याची माहिती सोमवारी (२३ डिसेंबर) मुख्यमंत्री डॉ. प्रमोद सावंत यांनी जाहीर केली. सुलेमान खान याला दोन दिवसांपूर्वीच अटक झाली असून आज त्याला गोव्यात आणलं जाईल असंही मुख्यमंत्री म्हणाले आहेत.

सुलेमान खान याला कोठडीतून पळून जायला मदत केलेल्या कॉन्स्टेबल अमित नाईक याच्या जामीन प्रकरणात तसेच सुलेमान खान हा पूर्ण सफाईने कोठडीतून फरार होण्यामागे सरकारचा हात असल्याचा आरोप विरोधी पक्षांनी केला होता. आता सुलेमान खान याला बेड्या ठोकण्यात आल्या असून तो त्याला पुन्हा गोव्यात आणलं जाईल असं म्हणत मुख्यमंत्री सावंत यांनी विरोधी पक्षांना सडेतोड उत्तर दिलं. सुलेमान खानचं नाव घेऊन वावरणाऱ्या लोकांना आता पोलिसांची शक्ती काय आहे याचा अंदाज आला असावा असं मुख्यमंत्री म्हणालेत.

सुलेमान सारख्या अट्टल आरोपीला पुन्हा एकदा तावडीत घेणारं माझं सरकार आहे, त्याला आम्ही दोन दिवसांपूर्वीच अटक केली होती मात्र आज आम्ही ही माहिती उघड करतोय, कारण त्याला केरळमध्ये अटक करण्यात आली असल्याने केरळ सरकार सोबत काही कागदपत्रांचं काम बाकी होतं अशी माहिती मुख्यमंत्र्यांनी दिली.

आत्तापर्यंत ज्यांनी सरकारला यासाठी जबाबदार ठरवलं त्यांना सडेतोड उत्तर मिळालं आहे. सुलेमान खान कुणी मोठा प्रतिष्ठित माणूस असल्याप्रमाणे आव आणत काही लोकं गेले काही दिवस वावरत होती त्या सर्वांना आणि सुलेमान खानच्या पलायनानंतर चुकीची माहिती पसरवणाऱ्यानां आता सर्व उत्तरं मिळतील असं म्हणत मुख्यमंत्र्यांनी गोव्यातील लोकांना न घाबरण्याचे तसेच असे चोर माझ्या हातून कधीही सुटणार नाही असे आश्वासन दिले आहे.