Panaji News :

पणजी, भारतीय भाषा विभाग, धेंपे कला आणि विज्ञान महाविद्यालय, गोवा कोकणी अकादमी आणि दाल्गाद कोंकणी अकादमीच्या संयुक्त विद्यमाने आयोजित केलेल्या ‘विद्यार्थी लेखकाचे भेटेक’ या कार्यक्रमात कोकणीतले प्रसिद्ध कथाकार रामनाथ गावडे आणि विन्सी क्वाद्रूस यांची विद्यार्थ्यांनी भेट घेतली.

दाल्गाद कोकणी अकादमीच्या सभागृहात हा कार्यक्रम झाला. उद्घाटन सत्राला दाल्गाद कोकणी अकादमीचे अध्यक्ष सॅल्सो फर्नांडिस, कथाकार रामनाथ गावडे, विन्सी क्वाद्रूस तसेच भारतीय भाषा विभाग प्रमुख अंजू साखरदांडे यांची उपस्थिती होती.

अंजू साखरदांडे यांनी स्वागत केले व या कार्यक्रमामागील हेतू व उद्देश त्यांनी स्पष्ट केला. सॅल्सो फर्नांडिस यांनी दाल्गाद कोकणी अकादमीच्या कार्यावर प्रकाश टाकला. विद्यार्थिनी मैथिली प्रभुदेसाई हिने मान्यवरांचा परिचय करून दिला.

कथाकार रामनाथ गावडे व विन्सी क्वाद्रूस यांनी त्यांच्या साहित्यिक प्रवासाविषयी विद्यार्थ्यांशी चर्चा केली.

सिद्धी मोरजकर, तनिमा पार्सेकर, ओंकार नाईक, रोहिणी मुरगावकर आणि गायत्री नाईक यांनी लेखकांना प्रश्न विचारले. या कार्यक्रमाला सुमारे ५० विद्यार्थी उपस्थित होते. कार्यक्रम यशस्वी करण्यासाठी भारतीय भाषा विभागाचे सहायक प्राध्यापक गौरांग भांडीये यांनी सहकार्य केले. कार्यक्रम यशस्वी करण्यासाठी धेंपे महाविद्यालयाच्या प्राचार्य प्रा. डॉ. वृंदा बोरकर यांनी मार्गदर्शन लाभले.

अनुभवाने कथाकार झालो : गावडे

लहान वयात कथा लिहिणे आणि वाचणे यामुळे मला अनेक अनुभव आले. अनुभवाने कथा आकार घेऊ लागल्या. अनेक कथा लिहिल्या गेल्या, पण पुस्तक प्रकाशित करण्याचा विचार पक्का झाल्यावर कथा निवडणे अवघड झाले. कधी मी कथा लिहिल्या तर कधी कथेने स्वतःला माझ्याकडून लिहून घेतले, असे रामनाथ गावडे यांनी सांगितले.

कथेच्या क्षेत्रात सातत्य महत्त्वाचे : क्वाद्रूस

विन्सी क्वाद्रूस म्हणाले की, अनुभवांमुळे कथा समृद्ध होते. लहानपणापासूनचे साहित्याचे वाचन झाल्याने फार आधार झाला. रोमन तसेच देवनागरी भाषेत लिहिल्याने कथेसाठी चांगले वाचक मिळाले. आजच्या मुलांनी कथा लिहिल्या पाहिजेत आणि लिहीत राहिल्या पाहिजेत. कथेच्या क्षेत्रात सातत्य महत्त्वाचे असते. तेव्हाच कथा आणि कथाकार समृद्ध होतात, असे ते म्हणाले.