दाबोळी: गोव्याला मान्सूनपूर्व पावसाने चांगलेच झोडपून काढले आहे. उत्तर गोव्यात म्हापसा, पेडण्यात मुसळधार पाऊस पडला. मुसळधार पावसामुळे राज्यात अनेकांची तारांबळ उडाली, रस्त्यावर पाणी साचले तर अनेक ठिकाणी इमारतींना गळती लागल्याचे पाहायला मिळाले. या पावसाचा राज्यातील विमानसेवेला देखील फटका बसला असून, दाबोळीवर उतरणारी दोन विमाने वळविण्यात आली आहेत.

राज्यात उत्तर आणि दक्षिण जिल्ह्याला पावसाने चांगलेच झोडपून काढले. रस्त्यावर पाणी साचल्याने वाहतुकीला अडथळा निर्माण झाला. काही ठिकाणी किरकोळ पडझड देखील झाली. मुसळधार पावसामुळे खराब झालेल्या वातावरणाचा विमानसेवेला फटका बसला. यामुळे दाबोळीवर उतरणारी दोन विमाने इतरत्र वळविण्यात आली आहेत.

मुंबईतून गोव्याला (दाबोळी विमानतळ) येणारे विमान कर्नाटकातील बेळगावला वळविण्यात आले. तर, पुण्यातून गेलेले दाबोळीवर उतरणारे विमान हैदराबादला वळविण्यात आले आल्याची माहिती विमानतळ संचालकांनी दिली आहे.

मान्सूनपूर्व झालेल्या मुसळधार पावसात खराब झालेल्या हवामानामुळे हा निर्णय घेण्यात आला आहे. दरम्यान, यामुळे प्रवाशांची मोठी गैरसोय सहन करावी लागत आहे.

डिचोली, साखळी, वाळपई, पणजीत मुसळधार

डिचोली, साखळी, वाळपई आणि राजधानी पणजीत पावसाने जोरदार बॅटींग केली. यामुळे रस्त्यावर मोठ्या प्रमाणवर पाणी वाहू लागल्याचे दिसून आले. अनेक भागात वीज पुरवठा खंडित झाला. तर, काही ठिकाणी झाड कोसळल्याची घटना उघडकीस आली.

राज्यात कुठे किती एम. एम. पावसाची नोंद झाली?

पेडणे- 161 mm

म्हापसा -157 mm

पणजी - 81 mm

मुरगाव - 75 mm

वाळपई - 43 mm

सांगे - 42 mm

केपे - 40 mm

फोंडा - 30 mm