President Draupadi Murmu Goa Visit: राष्ट्रपती द्रौपदी मुर्मू या गोव्याच्या तीन दिवसीय दौऱ्यावर होत्या आणि आज, गुरूवारी त्यांच्या दौऱ्याच्या अखेरचा दिवस होता. दरम्यान, आज गोव्यातील विविध कार्यक्रम आटोपून त्या निघत असताना फोंड्यात विद्यार्थ्यांना पाहून त्यांनी अचानक आपला ताफा थांबवला आणि त्या थेट विद्यार्थ्यांमध्ये जाऊन मिसळल्या.

राष्ट्रपती मुर्मू यांनी फोंड्यातील जीव्हीएम कॉलेजला भेट दिली. त्यांनी कॅम्पसमध्ये थेट येत विद्यार्थ्यांशी बोलल्या. सुरवातीला काही विद्यार्थी त्यांच्याशी थेट बोलायला लाजत होते. पण नंतर पाठीमागून आलेल्या मुख्यमंत्र्यांनी विद्यार्थी-विद्यार्थीनींना त्यांच्याजवळ बोलावून घेतले. यावेळी काही जणांनी फोटोही काढून घेतले.

भारताच्या राष्ट्रपतींचा ताफा थांबला असून त्या स्वतः विद्यार्थ्यांमध्ये मिसळत असल्याचे पाहून विद्यार्थीही भारावले. यावेळी विद्यार्थ्यांशी गप्पा मारत मुर्मू यांनी आपल्याकडील कॅडबरीज विद्यार्थ्यांना वाटल्या. विद्यार्थी-विद्यार्थिनी त्यानंतर प्रचंडी उत्साही झाले होते.

मुर्मू यांना भेटण्यासाठी विद्यार्थ्यांची एकच झुंबड उडाली. त्यावेळी राष्ट्रपतींच्या सुरक्षारक्षकांचीही थोडी धावपळ उडाली.

पण, राष्ट्रपतींच्या या साधेपणाने विद्यार्थी प्रचंड भारावले. त्यांच्यासोबत फोटो घेण्यासाठी, त्यांच्याशी बोलण्यासाठी विद्यार्थ्यांमध्ये चढाओढ सुरू होती. या वेळी राष्ट्रपती मुर्मू यांच्यासमवेत राज्यपाल पी. एस. श्रीधरन पिल्लई, मुख्यमंत्री डॉ. प्रमोद सावंत उपस्थित होते.