Goa Taxi Association

बेकायदा पर्यटक वाहतूक करणाऱ्या सिंधुदुर्गातील एका टेम्पो ट्रॅव्हल विरोधात कारवाई करावी, अशी मागणी गोवा टॅक्सी असोसिएशनच्या वतीने पत्रादेवी येथे घेतलेल्या पत्रकार परिषदेत करण्यात आली.

असोसिएशनचे सिद्धेश धारगळकर यांनी सांगितले की, मळगाव, सिंधुदुर्ग येथील एक टेम्पो ट्रॅव्हल व्यावसायिक गोव्यात बेकायदा पर्यटक वाहतूक करीत आहे.

तसेच एकाच गाडीचा नंबर दुसऱ्या गाड्यांना वापरून तो महाराष्ट्र तसेच गोवा सरकारला फसवत आहे. कुठल्याही प्रकारचे शुल्क वा टॅक्स न भरता हा इसम व्यवसाय करीत आहे. हल्ली गोव्यात जी गाडी पकडली तोच नंबर असलेली अन्य एक गाडी पर्यटकांना घेउन महाराष्ट्रात देवदर्शन करताना आढळून आली. याबाबत महाराष्ट्र पोलिस, वाहतूक विभाग आणि गोवा वाहतूक खात्याकडे त्यांनी तक्रार केली आहे, असे त्यांनी सांगितले.

यावेळी टॅक्सी संघटनेचे तसेच टेम्पो ट्रॅव्हलचे नारायण चोडणकर, दापोली शिरोडकर, निशांत परब, सुदीप शेट्ये, अभिजित साळगावकर, साभाजी गावकर आदी उपस्थित होते.

गोव्यातील व्यावसायिकांना फटका

धारगळकर यांनी सांगितले की, पर्यटकांना आणण्यासाठी तसेच पर्यटन स्थळावर नेण्यासाठी आम्ही कायदेशीररीत्या व्यवसाय करतो.

गोव्यातील अनेक बेरोजगार युवकांनी बँकेकडून कर्ज घेउन वाहने घेतली आहेत. मात्र अशा बेकायदा प्रकारामुळे गोव्यातील व्यावसायिकांना याचा फटका बसत आहे, असे ते म्हणाले. या विरोधात कठोर कारवाई करावी, अशी मागणी त्यांनी केली.