गोमन्तक- सकाळ समूह आयोजित अग्निष्टोम महासोमयाग म्हापसात काणका येथील विश्वाटी विश्वेश्वर देवस्थानच्या परिसरात सोमयाग सुरू आहे. विश्वकल्याणार्थ आयोजित या महासोमयागाला रविवारपासून प्रारंभ झाला आहे. आज यज्ञाच्या चौथ्या दिवशी देखील विविध विधी पार पडले. यात प्रामुख्याने 'वेदीकरण' आणि 'प्रवर्ग्य' असे दोन विधी पार पडले.

या महासोमयागाला केंद्रीय राज्य मंत्री श्रीपाद नाईक आज भेट दिली. यावेळी त्यांनी महासोमयाग आयोजनाबद्दल गोमन्तक- सकाळ समूहाला शुभेच्छा दिल्या. "सकाळ गोमंतकने आयोजित केलेल्या सोमयाग यज्ञ उत्सवाला येण्याची संधी मला मिळाली हे मी माझे भाग्य समजतो. यज्ञ हीच आमची संस्कृती असून सोमयागासारखे यज्ञ उत्सव हे कुणा एकाच्या हितासाठी नसून समाज, राज्य, राष्ट्र यांची उन्नती व्हावी हाच शुद्ध हेतू मनात ठेऊन ही कार्य आरंभली जातात.

सोमयाग यज्ञ उत्सव करून आपल्या संस्कृतीचे पालन आणि जपणूक करण्याचे काम सकाळ, गोमंतक करत आहे. सोमयाग उत्सवाच्या माध्यमातून जे जे काही अनिष्ट, विघ्न, संकट असेल ते नक्कीच दूर होणार आहे. प्रत्येक माणसाच्या मनात सत्याची, धर्माची भावना जागृत होणार आहे. ही परंपरा अशीच पुढे चालत राहावी अशी विनंती मी ईश्वरचरणी करतो" अशी प्रतिक्रिया श्रीपाद नाईक यांनी दिली.

तसेच वीजमंत्री सुदिन ढवळीकर यांनीही काल सोमयाग यज्ञ उत्सवाला उपस्थिती दर्शवली. यावेळी बोलताना ते म्हणाले, सोमयाग उत्सवाला सहभागी होता आलं याचा मला खूप आनंद आहे. गोव्यात नवचंडी, शतचंडी यासारखे उत्सव साजरे होतात. मात्र सोमयाग हा क्वचितच केला जातो. सर्वांनी या उत्सवात सक्रिय सभागी व्हावे आणि याचा आनंद घ्यावा.