CM Pramod Sawant : राज्यातील स्वयंपूर्ण मित्रांसाठी खुशखबर...! मुख्यमंत्र्यांनी केली मोठी घोषणा

CM Pramod Sawant : मुख्यमंत्र्यांनी राज्यातील स्वयंपूर्ण मित्रांसाठी एक महत्वाची घोषणा केली आहे. स्वयंपूर्ण मित्रांना सरकारतर्फे बोनस देण्यात येणार आहे. येथील मिनेझिस ब्रागांझा सभागृहात तालुका नोडल अधिकारी आणि 'स्वयंपूर्ण मित्र यांच्या मार्गदर्शन आणि प्रशिक्षण कार्यक्रमात त्यांनी याबाबतची माहिती दिली.

सर्वोत्तम कामगिरी करणाऱ्या शंभर स्वयंपूर्ण मित्रांना वार्षिक कामगिरीचा आढावा घेवून बोनस देण्यात येईल असे त्यांनी यावेळी सांगितले. तसेच केंद्रीय एमएसएमई मंत्रालयाच्या पुढाकाराने पारंपारिक उद्योगाच्या पुर्नजन्मासाठी निधी योजनेअंतर्गत सर्व बाराही तालुक्यांमध्ये क्लस्टर्स स्थापना करण्याच्या सरकारच्या योजनेचीही घोषणा या प्रसंगी केली.

"राज्यात सध्या एकूण 210 स्वयंपूर्ण मित्र आत्मनिर्भर भारत-स्वयंपूर्ण गोवा मोहिमेअंतर्गत काम करीत आहेत. विविध कार्यक्रमांत त्यातील निवडक मित्रांचाच गौरव करण्यात येतो.

परंतु, इतर अनेक स्वयंपूर्ण मित्र स्वत:ची वाहने, पैसा खर्च करून सुट्टीच्या दिवशीही प्रामाणिकपणे सेवा बजावत आहेत. त्यामुळेच यंदा उत्कृष्ट कामगिरी करणाऱ्या शंभर स्वयंपूर्ण मित्रांना बोनस देण्याचा निर्णय सरकारने घेतलेला आहे", असे मुख्यमंत्री म्हणाले.