देशातील वाढती लोकसंख्या ही चिंतेची बाब. अशावेळी यावर नियंत्रणासाठी समान नागरी कायदा गरजेचा आहे. हा कायदा चालू वर्षांत किंवा पुढच्या निवडणुकीनंतर चालीस लावण्याचा आमचा प्रयत्न असेल. जेणेकरून मूलभूत विकासाचा लाभ अधिक चांगल्या पद्धतीने सर्वसामान्य घेऊ शकतील, असे मनोगत केंद्रीय मंत्री श्रीपाद नाईक यांनी व्यक्त केले.

सोमवारी, म्हापशात भाजपा कार्यालयात आयोजित पत्रकार परिषदेत ते बोलत होते. यावेळी आमदार प्रेमेंद्र शेट, माजी आमदार जयेश नाईक, महानंद अस्नोडकर, आशिष शिरोडकर, राजसिंग राणे हे व्यासपीठावर उपस्थित होते. जीडीपीबाबत श्रीपाद नाईक म्हणाले, विकासकामे करताना जीडीपी थोडीशी कमी-जास्त होते.

मात्र अधिक जीडीपीचा तसा त्रास झालेला दिसत नाही. केंद्र सरकारकडून जवळपास 80 कोटी लोकांना मोफत धान्यांचे वितरण केल्याचे ते म्हणाले. तर कर्नाटकातील विधानसभा निवडणुकीवर भाऊ म्हणाले की, कर्नाटक निकाल भाजपाच्या अपेक्षेप्रमाणे लागला नाही. लोकसभेवर त्याचा परिणाम होणार नाही.

घरोघरी प्रचार

आमदार प्रेमेंद्र शेट म्हणाले, मोदी सरकारला नऊ वर्षे पूर्ण झाली. त्यामुळे भाजपाने विविध कार्यक्रम व उपक्रम हाती घेतलेत. त्याअंतर्गत, राज्यात 1 ते 8 जूनपर्यंत प्रभावी कार्यकर्त्यांसोबत लोकांच्या गाठीभेटी घेतल्या जातील. 8 ते 12 जूनपर्यंत पक्षातील ज्येष्ठ कार्यकर्त्यांच्या गाठीभेटी घेणार. विकासतीर्थ यात्रेतंर्गत श्रीपाद भाऊ हे उत्तरेतील आयुष इस्पितळ व मोपा विमानतळास भेट देतील. याशिवाय पक्षाचे विविध आघाडी मोर्चाचे कार्यकर्ता महामेळावे व त्यानंतर कार्यकर्त्यांसह घरोघरी प्रचार केला जाईल.

भिकारीही बाहेरचे

राज्यातील भिकाऱ्यांच्या समस्येवर विचारलेल्या प्रश्नावर भाष्य करताना श्रीपाद भाऊ म्हणाले, राज्यातील भिकाऱ्यांची टोळी सक्रिय आहे. अनेकांना गाडीमधून आणून ठरावीक जागेवर सोडले जाते. हा विषय गांभीर्याने मी मुख्यमंत्र्यांकडे मांडणार आहे. याशिवाय रस्त्यावर सापडणारे भिकारी हे गोमंतकीय नाहीत, ते अधिकतर बाहेरील राज्यातील असतात, याकडे त्यांनी लक्ष वेधले.