Goa Crime: जावयाच्या मारहाणीत 64 वर्षीय सासऱ्याचा मृत्यू, थिवी येथील घटना

Goa Crime सध्या गोव्यात गुन्हेगारीच्या घटनांमध्ये दिवसेंदिवस वाढ होत असून नुकतीच घरगुती वादातून एका वृद्ध व्यक्तीचा मृत्यू झाल्याची घटना घडली आहे.

थिवी येथे जावयाच्या मारहाणीत 64 वर्षीय सासऱ्याचा मृत्यू झाल्याची घटना घडली असल्याची प्राथमिक माहिती मिळाली आहे.

डेनिस पौल डायस असे मृत व्यक्तीचे नाव असून या प्रकरणी जावई जेवीटन डिसोझाला (वय 39) अटक करण्यात आल्याची माहिती प्राप्त झाली आहे.

यासंबंधी प्राप्त झालेली माहिती अशी कि, आरोपी जोनिटोन डिसूझा हा आपल्या कुटुंबासह थिवी येथे त्याच्या सासरी राहत होता. त्याचे आणि त्याच्या सासऱ्यांचे खटके उडत असत.

तसेच जोनिटोन राहत असलेली जागा सोडावी अशी मागणी त्याचे सासरे वारंवार करत असत आणि याच कारणामुळे जोनिटोन याची डेनिस पॉल यांच्याशी बाचाबाची होत असे. जोनिटोन याने डेनिस यांना जीवे मारण्याच्या धमक्या देखील दिल्या होत्या.

दरम्यान 3 जून रोजी जोनिटोन याने डेनिस पॉल डायस यांच्यावर त्यांच्या निवासस्थानी क्रूरपणे प्राणघातक हल्ला केला. या केलेल्या मारहाणीत डेनिस यांचा मृत्यू झाला.

या संदर्भात आरोपी जोनिटन डिसूझा याला 04 जून रोजी अटक करण्यात आली असून सध्या 04 दिवसांची पोलीस कोठडी सुनावली आहे.

पुढील तपास एसपी निधी व्हॅल्सन यांच्या देखरेखीखाली कोलवाळ पोलीस स्टेशनद्वारे पीआय सोमनाथ महाजिक, पीएसआय कुणाल नाईक करत आहेत.