फोंडा: फर्मागुढी-फोंडा येथे १७ ते १९ मे असे तीन दिवस शंखनाद महोत्सव होणार आहे. त्‍याची तयारी सध्या जोरात सुरू आहे. ‘न भूतो, न भविष्‍यति’ व राज्यात आतापर्यंत झाला नाही एवढे भव्य आणि दिव्य असे या महोत्सवाचे स्वरूप असेल. लाखो भाविक महोत्‍सवाला उपस्‍थिती लावतील, अशी माहिती आयोजकांतर्फे देण्यात आली.

फर्मागुढीतील अभियांत्रिकी महाविद्यालयाजवळील विस्तीर्ण मैदानावर हा शंखनाद महोत्सव होईल. येत्या शुक्रवारी १६ रोजी संध्याकाळी ३ वाजता भव्य मिरवणूक काढण्यात येणार आहे. ही मिरवणूक रामनाथी येथील सनातन आश्रमाकडून सुरू होणार असून फोंडामार्गे फर्मागुढीला येईल. त्यानंतर उभारण्यात आलेल्या भव्य मंडपाचे उद्‌घाटन वीजमंत्री सुदिन ढवळीकर यांच्या हस्ते होणार आहे.

या शंखनाद महोत्सवाला उपस्थित राहण्यासाठी भव्य अशा मंडपांची उभारणी करण्यात आली आहे. त्यात मुख्य मंडपात अकरा हजार तर बाजूच्या दोन मंडपात प्रत्येकी सात हजार लोकांची बसण्याची क्षमता असेल.

भोजनाची व्यवस्था अन्य मंडपात करण्यात आली आहे. सहभागींना आपले आधारकार्ड सोबत आणावे लागेल, अशी माहिती आयोजकांतर्फे अभय वर्तक, जयंत मिरिंगकर, जयेश थळी, सत्यविजय नाईक व सुचेंद्र अग्नी यांनी दिली.