Goa Shack: नव्या धोरणानुसार किनारी भागातील स्थानिक शॅक व्यावसायिकांना लवकरच व्यवसायासाठी योग्य त्या सवलती देण्यात येतील तसेच गोवा प्रदूषण नियंत्रण मंडळाकडून कुणाचीच अडवणूक होणार नाही, अशी ग्वाही पर्यटनमंत्री रोहन खंवटे यांनी मंगळवारी कांदोळीत दिली.

कांदोळी येथील किनारी भागात पारंपरिक शॅक व्यावसायिकांसाठी पंचायतीतर्फे उपलब्ध करून देण्यात आलेल्या कचरावाहू वाहनांचे(टॅंकर) फीत कापून उद्‍घाटन केल्यानंतर मंत्री खंवटे बोलत होते. दरम्यान,यंदाच्या हंगामातील पहिल्या चार्टर विमानाचे आगमन झालेले असून विदेशी पाहुण्यांना राज्यातील किनारी भागात समाधानकारक सोयी देण्यासाठी पर्यटन खाते नेहमीच अग्रेसर असते असे मंत्री खंवटे यांनी पुढे सांगितले.

गेल्या पर्यटन हंगामात याभागातील कचरा व्यवस्थापनात घोळ झाल्याने प्रदूषण नियंत्रण मंडळ तसेच न्यायालयाकडून 167 शॅक्सना टाळे ठोकण्यात आले यंदा ही समस्या निपटून काढण्यासाठी स्थानिक पंचायतीने पुढाकार घेतला असून टॅंकरची सोय केली आहे. यावेळी कळंगुटचे आमदार मायकल लोबो, स्थानिक सरपंच जोसेफ सिक्वेरा, उपसरपंच गीता परब, रॉयल एक्झॉटीकाचे व्यवस्थापक, भाजपचे कळंगुट संघटक गुरुदास शिरोडकर, पंचायत सचिव अर्जुन वेळीप, पंचायत सदस्य व अन्य मान्यवर उपस्थित होते. सूत्रसंचालन पंच सदस्य स्वप्निल वायंगणकर यांनी केले.