Water Problem: हरमल येथील कित्येक भागांत नळ जोडणीतून पाणीपुरवठा होत नसल्याने टँकरने पाणीपुरवठा सुरू होता, पण गेले काही दिवस कंत्राटाची मुदत संपल्यामुळे पाणीपुरवठा बंद करण्यात आला आहे. त्यामुळे या भागात तीव्र पाणी टंचाई सुरू आहे.

ग्रामस्थांचे हाल होत असून कंत्राट संपल्याचे कारण सांगून ग्राहकांची दिशाभूल केल्याने नागरिक संतप्त होत आहेत.

भागातील विशेषतः मधलावाडा, बामणभाटी भागात नळ जोडणी असलेल्या ग्राहकांना अत्यल्प प्रमाणात पाणी पुरवठा होत असल्याने ग्राहक नाराज आहेत.

व्यवस्थित पाणीपुरवठा करण्यासाठी ग्राहकांनी अनेकदा खात्याच्या अधिकाऱ्यांना व कर्मचाऱ्यांना घेऊन जोडण्यातील अडथळे दूर करण्याचे प्रयत्न केले.

कित्येक भागांत नळ जोडणी असूनही पाणीपुरवठा होत नसल्याने ग्राहकांसाठी टँकरने पाणीपुरवठा हा उत्तम पर्याय आहे. सरकारने तोडगा काढण्यासाठी पावले उचलली पाहिजे, असे मत नागरिक व्यक्त करतात. टँकरचे कंत्राट संपल्याचे कारण सांगून खाते जबाबदारी झटकत असल्याने नागरिकांनी संताप व्यक्त केला.

आमदारांनी लक्ष द्यावे

अत्यल्प प्रमाणात पाणीपुरवठा होऊनही दर महिन्याची बिले भरली जाता, पण पाणीपुरवठ्याकडे दुर्लक्ष केले जाते. सरकार सध्या मोफत पाणीपुरवठा योजना राबवीत असले, तरी लोकांपर्यंत ते पाणी पोचत नसल्याने नागरिकांनी संताप व्यक्त केला. आमदार जीत आरोलकर यांनी पाणीपुरवठा खात्याच्या अधिकाऱ्यांशी बोलणी करून लोकांना दिलासा द्यावा, अशी मागणी सर्व थरातून होत आहे.