Ramesh Tawadkar On Goa Assembly Session: गोवा विधानसभेचे अधिवेशन जुलैच्या तिसऱ्या आठवड्यात होण्याची शक्यता आहे, तसे संकेत विधानसभेचे सभापती रमेश तवडकर यांनी दिले आहेत. दरम्यान, हे अधिवेशन 15 ते 20 दिवस चालेल, अशी माहितीही त्यांनी दिली. ते पत्रकारांशी बोलत होते.

तवडकर यांनी निश्चित्त तारीख सांगितली नाही. तथापि, जुलैच्या तिसऱ्या आठवड्यात अधिवेशन होईल, असे ते म्हणाले. विरोधकांनी चर्चेसाठी वेळ मिळावा, असे म्हटले होते. या अधिवेशनात विरोधकांची अपेक्षा निश्चित्तपणे पूर्ण होईल.

हे अधिवेशन दीर्घ काळ चालणारे असेल त्यामुळे चर्चेला पुरेसा वाव मिळणार आहे. ज्या ज्या विषयांवर विरोधकांना चर्चा करायची आहे, त्यासाठी पुरेसा वेळ मिळेल. दोन ते तीन दिवसांत अधिवेशनाची नेमकी तारीख घोषित करू, असेही त्यांनी सांगितले.

दरम्यान, गेल्या तीन वर्षात हे अधिवेशन दीर्घकाळ चालणारे असेल, अशी चर्चा आहे. अधिवेशनात अर्थसंकल्पावर सविस्तर चर्चा होणार आहे.