गोव्यातील ड्रग माफिया (Drug Mafias) विरोधात येत्या तीन महिन्यात कडक करवाई करणार असल्याचे मुख्यमंत्री प्रमोद सावंत (CM Pramod Sawant ) यांनी आश्वासन दिले आहे. वैयक्तिक या प्रकरणात लक्ष घालून याची पाळमुळ नष्ट करण्यासाठी प्रयत्न करणार असल्याचे मुख्यमंत्री प्रमोद सावंत यांनी सांगितले. एका वृत्तवाहिनेला दिलेल्या मुलाखतीत सावंत यांनी याबाबत माहिती दिली.

देशभरात चर्चेत असलेले भाजप नेत्या सोनाली फोगाट (Sonali Phogat) यांच्या हत्या प्रकरणामुळे गोव्यातील ड्रगचा विषय पुन्हा ऐरणीवर आला आहे. मुख्यमंत्री प्रमोद सावंत म्हणाले, 'गोव्यातून ड्रग हद्दपार करण्यासाठी आम्ही प्रयत्न करत आहोत. अमली पदार्थ विरोधी पथकाला अजून मजबूत करण्यासाठी त्यांना आवश्यक मनुष्यबळ पुरवले जाईल. आमचा गृह विभाग याविरोधात कडक कारवाई करेल, जेणेकरून यापुढे अमली पदार्थाच्या घटना गोव्यात घडणार नाहीत. गोव्यात येणारे पर्यटक आनंद लुटण्यासाठी येतात न की ड्रग घेण्यासाठी हा मेसेज लोकांपर्यंत जाणे आवश्यक आहे.' असे त्यांनी नमूद केले.

दरम्यान, सोनाली फोगाट प्रकरणाचा तपास सीबीआयकडे (CBI) देण्याबाबत विचारलेल्या प्रश्नावर मुख्यमंत्री म्हणाले, 'हरियाणाच्या मुख्यमंत्र्यांनी (Haryana CM) फोगाट प्रकरणाचा तपास सीबीआयकडे देण्याबाबत मला वनंती केली आहे. पण, गोवा पोलिसांनी (Goa Police) याप्रकरणात आजवर पाच जणांना अटक केली आहे. याची चौकशी देखील सध्या वेगात सुरू आहे. तपासाचा अहवाल तसेच, गोपनीय अहवाल देखील हरियाणाच्या मुख्यमंत्र्यांना पाठवला आहे.' पण, या फोगाट प्रकरणाच्या तपासावरून आम्ही समाधानी असल्याचे सावंत म्हणाले. तसेच, सोनाली फोगाट प्रकरणात कुठलाही आरोपी सुटणार नाही असे प्रमोद सावंत म्हणाले.