Car Accident Goa: गोव्यात शनिवारी आणि रविवारी दोन दिवसांत पाच अपघातांची नोंद झाली आहे. या अपघातात तीन जणांचा मृत्यू झाला असून, राज्याला लागलेले अपघाताचे ग्रहण कधी सुटणार हा प्रश्न कायम आहे.

रविवारी बाळ्ळी येथे कार आणि दुचाकीच्या झालेल्या अपघातात दुचाकीस्वाराचा मृत्यू झाला आहे.

मिळालेल्या माहितीनुसार, बाळ्ळी येथे भरधाव कारने ओव्हटेक करण्याच्या नादात दुचाकीला धडक दिली. या धडकेत सांतान फर्नांडिस (वय 64, रा. बाळ्ळी) यांना गंभीर दुखापत झाली.

दरम्यान, उपचारासाठी त्यांना रूग्णालयात दाखल करण्यात आले. उपचारादरम्यान, फर्नांडिस यांचा मृत्यू झाला आहे. अपघातप्रकरणी पोलिसांनी कार चालक रूचिता कुमार यांना अटक केली आहे.

दरम्यान, शनिवारी मिरामार येथे कारचा अपघात, बोरीत LPG सिलिंडर वाहतूक करणारा ट्रक उलटला आहे.

मिरामार बीचजवळ वीज खांबाला भरधाव कारने धडक दिली आहे. अपघातात कारच्या समोरच्या भागाचे नुकसान झाले असून, कार चालकाला किरकोळ दुखापत झालीय. 

बोरी येथे LPG सिलिंडर वाहतूक करणारा ट्रक उलटला आहे. चालकाचे नियंत्रण सुटल्याने ट्रक उलटला असल्याचे स्थानिकांनी सांगितले. अपघातात ट्रक चालक उपेंद्र कुमार (वय 35) जखमी झाला आहे.