गोवा विधानसभेचे अधिवेशन येत्या 16 जानेवारीपासून होणार आहे. अधिवेशन काळात मोर्चे निघण्याची शक्यता असल्याने उत्तर गोवा जिल्हाधिकारी मामु हगे यांनी कलम 144 (1) अंतर्गत जमावबंदीचे आदेश लागू करण्यात आले आहेत. त्यानुसार, पाच व पाचपेक्षा अधिक लोकांना एकत्र येण्यास मज्जाव करण्यात आला आहे. तसेच, घोषणा देणे, स्पिकर लावण्यास, बंदी, लाग लावून निषेध करण्यास तसेच, लाठी, तलवार, चाकू अशी घातक हत्यारे जवळ बाळगण्यास बंदी घातली आहे.

जिल्हाधिकारी यांच्या आदेशात काय म्हटले आहे?

गोवा विधानसभेचे हिवाळी अधिवेशन येत्या 16 जानेवारीपासून सुरू होणार आहे. यावेळी विधानसभेत म्हादई, पीएसआय घोटाळा, पिळर्ण आगीची घटना यासारखे विषय गाजण्याची शक्यता आहे. यावरून लोकांचे मोर्चे देखील निघण्याची शक्यता आहे. त्यामुळे वाहतूक कोंडी, सामान्य नागरिकांना त्रास होण्याची शक्यता नाकारता येत नाही. त्यामुळे अधिवेशन काळात जमावबंदीचे आदेश लागू करण्यात आले आहेत.

कशावर बंदी

- पाच व पाचपेक्षा अधिक लोकांना एकत्र येण्यास किंवा सभा घेण्यास बंदी

- लाठी, तलवार, चाकू किंवा धारदार वस्तू जवळ बाळगण्यास बंदी

- स्पिकर लावण्यास तसेच, घोषणा देण्यास बंदी

- आग लावण्यास बंदी

वरील कोणतीही गोष्ट कोणत्याही ठिकाणी, रस्ता, चौकात किंवा मोकळ्या जागेत तसेच, विधानसभेच्या पाचशे मीटर परिसरात आणि पणजी परिसरात करण्यास बंदी घातली आहे. 16 जानेवारी सकाळी दहा वाजल्यापासून हे आदेश लागू होणार आहेत.