साखळी: गोकुळवाडी-साखळी येथे मुख्य रस्त्यावर १९ जून रोजी रात्री ८ वा. च्या सुमारास एक कारने मोटरसायकलवाल्याला चुकीच्या दिशेने जात जोरदार धडक देऊन घटनास्थळावरून पळ काढला. पण साखळीतील लोकांनी या कारचा पाठलाग करून सदर कारला विठ्ठलापूर-साखळी येथे रोखून धरले व पोलिसांना माहिती दिली.

डिचोली पोलिसांनी या प्रकरणी ‘हिट अँड रन’प्रकरणी गुन्हा नोंदवून सत्तरीतील १७ वर्षीय अल्पवयीन चालकासह चार जणांना अटक करण्यात आली.

या प्रकरणात डिचोली पोलिसांनी सुर्ल-ठाणे सत्तरी येथील जयेश लवू गावस, घोटेली केरी सत्तरी येथील साहिल श्रीपाद गावस (वय २७), सुर्ल सत्तरी येथील अतुल आनंद गावकर (वय २८) व सुर्ल सत्तरी येथील एका १७ वर्षीय अल्पवयीन कार चालकाला अटक केली आहे.

गोकुळवाडी-साखळी येथील राजू कामत यांच्या घराजवळ रस्त्यावर जीए ०३ व्हाय २२२२ या कारने साखळी ते डिचोली या रस्त्यावर पूर्णपणे चुकीच्या दिशेने येत साखळीहून कुडणे येथे आपल्या हिरो स्प्लेंडर या जीए ०४ एम ९७११ क्रमांकाच्या मोटरसायकलने जाणाऱ्या प्रणेश प्रकाश मळीक (वय ३०) याला समोरून जोरदार धडक देऊन ठोकरले.

या धडकेबरोबर प्रणेश मळीक हा उसळून क्रेटा कारच्या बॉनेटवर पडला, तर मोटरसायकल उसळून रस्त्यावर मध्यभागी पडली. मोटरसायकल चालक बचावला.