Goa Accident: महाराष्ट्रातून बॉयलर कोंबड्या घेऊन गोव्याला येणाऱ्या जीपचा नानोड्यात अपघात, चालकाची सुखरुप सुटका

डिचोली: बॉयलर कोंबड्यावाहू जीपगाडीला झालेल्या अपघातात जीपगाडीच्या केबिनमध्ये अडकून पडलेल्या चालकाची डिचोली अग्निशमन दलाच्या जवानांनी सुखरुप सुटका केली. तर जीपगाडीतील अन्य एकाने स्वतःच सुटका करुन घेतली. हा अपघात बुधवारी (18 जून) पहाटे अस्नोडा-दोडामार्ग रस्त्यावरील नानोडा येथे घडला.

दरम्यान, या अपघातात (Accident) जीपगाडीच्या केबिनमध्ये अडकलेल्या मूळ पाटणे-महाराष्ट्र येथील सिद्धांत नाईक या चालकावर डिचोली सामाजिक आरोग्य केंद्रात प्राथमिक उपचार करण्यात आले असून, त्याची प्रकृती स्थिर असल्याची माहिती मिळाली आहे.

एमएच-09-ईएन-5485 या क्रमांकाची जीप महाराष्ट्रातून (Maharashtra) बॉयलर कोंबड्या घेऊन गोव्यात येत होती. नानोडा येथे आधीच कोसळलेल्या झाडाचा जीपचालकाला अंदाज आला नाही आणि जीपगाडीने सरळ झाडाला धडक दिली. या अपघातात जीप चालक केबिनमध्ये अडकून पडला. डिचोली अग्निशमन दलाला या अपघाताची माहिती मिळताच, उपअधिकारी शिवाजी नाईक आणि अर्जुन धावस्कर यांच्या नेतृत्वाखाली जवानांनी अपघातस्थळी धाव घेतली. जवानांनी जीपगाडीच्या केबिनचा पत्रा कापून चालकाला सुखरुप बाहेर काढले.