म्हापसा : मुड्डोवाडा-साळगाव येथे गुरुवारी घडलेल्या दुहेरी खुनाच्या घटनेने संपूर्ण गोवा राज्‍य हादरून गेले. रिचर्ड डिमेलो (६५, रा. गिरी-म्‍हापसा) आणि अभिषेक गुप्ता (मूळ इंदूर, मध्यप्रदेश) या दोघांची गळा चिरून आणि भोसकून निर्घृण हत्या करण्यात आली. दरम्‍यान, मयत रिचर्ड डिमेलो हे तृणमूल काँग्रेसचे नेते ट्रोजन डिमेलो यांचे बंधू होत.

मिळालेल्‍या माहितीनुसार, रिचर्ड डिमेलो हे म्युझिकल पार्टस्‌ दुरुस्ती व्यवसायात कार्यरत होते, तर अभिषेक हा रिचर्ड यांच्याकडे कामगार म्हणून कामाला होता.

काही दिवसांपूर्वीच तो या ठिकाणी राहायला आला होता. पहाटे अभिषेक राहत असलेल्या भाड्याच्या खोलीत रिचर्ड आले होते. त्‍याच ठिकाणी रिचर्ड व अभिषेक या दोघांचे मृतदेह आढळल्याने परिसरात एकच खळबळ उडाली.

हे दुहेरी हत्‍याकांड नेमक्‍या कोणत्या उद्देशाने घडवून आणले गेले, हे अद्याप समजू शकलेले नाही. पोलिसांनी या प्रकरणी एका संशयिताची ओळख पटविली असून, शोधमोहिमेसाठी पोलिसांची विविध पथके स्थापन करण्यात आली आहेत.

अभिषेक याच्यासोबत मुड्डोवाडो येथील भाड्याच्या खोलीत आणखीन एक भाडेकरू राहायचा. त्‍यानेच हे कृत्‍य केल्‍याचा संशय आहे.

खुनामागील पार्श्वभूमी

अभिषेक गुप्ता व संशयित या दोन्‍ही कामगारांमध्‍ये घटनेच्या आदल्या दिवशी वाद झाल्याची माहिती समोर आली आहे. पोलिसांचा अंदाज आहे की, हा वाद पुन्हा पेटला आणि त्याच रागातून संशयिताने अभिषेक याच्‍यासह त्‍यावेळी तेथे आलेले रिचर्ड डिमेलो या दोघांची हत्या केली.

तपासाची दिशा

पोलिसांनी घटनास्थळावरून खुनासाठी वापरलेले धारदार हत्यार जप्त केले.

रिचर्ड यांची दुचाकी घेऊन संशयित फरार. नंतर ती सापडली थिवी रेल्वेस्थानकाबाहेर.

संशयित मुंबईकडे जाणाऱ्या रेल्वेतून फरार झाल्याचा पोलिसांना संशय.

रेल्वेस्थानकातील सीसीटीव्ही फुटेज तपासून पोलिसांनी पटविली संशयिताची ओळख.

संशयिताचा शोध घेण्यासाठी पोलिसांची विविध पथके स्‍थापन; महाराष्ट्र पोलिसांनाही दिली माहिती.