पणजी: नगर व ग्रामनियोजन खात्याने सासष्टी तालुक्यातील सुमारे १ कोटी १ लाख ८९ हजार ४८३ चौरस मीटर (१.०२ कोटी चौ. मी.) क्षेत्र ‘ना विकास क्षेत्र’ म्हणून घोषित करण्याचा प्रस्ताव मांडला आहे. टीसीपी कायद्यातील कलम ३९(अ) अंतर्गत हा प्रस्ताव असून, त्यावर नागरिकांकडून ३० दिवसांच्या आत सूचना व हरकती मागविल्‍या आहेत.

या प्रस्तावात मुळे, बाणावली, कुडतरी, दिकरपाल आणि सां जुझे द आरियाल या सासष्टीतील पाच गावांतील विस्तीर्ण भूभागाचा समावेश आहे. हे क्षेत्र ‘अविकसित क्षेत्र’ म्हणून घोषित झाल्यास भविष्यातील बांधकामे व विकासकामांवर निर्बंध येण्याची शक्यता आहे. टीसीपी खात्याने संबंधित गावांतील नागरिक, जमीनमालक, ग्रामपंचायती आणि अन्य इच्छुक पक्षांना लेखी हरकती व सूचना सादर करण्याचे आवाहन केले आहे.

राज्यातील जमीन रूपांतरण प्रक्रियेला वेग देत नगर व ग्रामनियोजन (टीसीपी) खात्याने टीसीपी कायद्याच्या कलम ३९(अ) अंतर्गत आणखी १८ भूखंडांचे वसाहत (सेटलमेंट) विभागात रूपांतर करण्याचा प्रस्ताव जाहीर केला आहे. या प्रस्तावात एकूण २५ हजार १७४ चौरस मीटर क्षेत्राचा समावेश असून, नागरिकांकडून ३० दिवसांच्या आत सूचना, हरकती मागविल्‍या आहेत.

कलम ३९(अ) अंतर्गत होणाऱ्या जमीन रूपांतरणांवर यापूर्वीही पर्यावरणीय आणि नियोजनाच्या मुद्द्यांवरून चर्चा झाली आहे. कृषी, नैसर्गिक व मोकळ्या जमिनींचे वसाहत विभागात रूपांतर करण्यास स्थानिक नागरिक आणि पर्यावरणप्रेमींकडून आक्षेप घेतले जात आहेत. टीसीपी खात्याने प्रस्ताव सार्वजनिक करून नागरिक, ग्रामस्थ आणि संबंधित पक्षांना लेखी सूचना व हरकती सादर करण्याचे आवाहन केले आहे. प्राप्त हरकतींचा विचार केल्यानंतर या प्रस्तावांवर अंतिम निर्णय घेतला जाणार आहे.

अनियंत्रित शहरीकरणाला घालणार आळा

पर्यावरणीय, नैसर्गिक आणि नियोजनात्मक महत्त्व लक्षात घेऊन या भूभागाला ‘नो-डेव्हलपमेंट झोन’ म्हणून राखून ठेवण्याची शिफारस करण्यात आली आहे. अनियंत्रित शहरीकरणाला आळा घालणे आणि संवेदनशील भूभागाचे संरक्षण करणे हा या प्रस्तावामागील उद्देश आहे.