Sakhyahari kalotsav, Savoi Verem Goa

सवाईवेरे: जपलेल्या परंपरा आणि संस्कृतीसाठी गोवा आजही ओळखला जातो आणि गोव्याच्या परंपरेतील एक महत्वाचे पान म्हणजे इथे होणार जत्रौत्सव. गावागावात मंदिरांमध्ये सध्या जत्रौत्सवाला उधाण आले आहे आणि यांपैकीच एक म्हणजे सवाईवेऱ्याच्या मदनांताची किंवा अनंताची जत्रा. बुधवार (दि. ४ डिसेंबर) पासून या जत्रेला सुरुवात झाली आहे. आज म्हणजेच पहिल्या दिवशी सख्याहरीने या अनंतोत्सवाला प्रारंभ झाला असून हा उत्सव १० डिसेंबर पर्यंत सुरु राहील.

सवाईवेऱ्यातील हे मंदिर गोव्यातील प्रसिद्ध आणि जागृत देवस्थांपैकी एक आहे. या अनंत देवस्थानातील वार्षिक अनंतोत्सवाला 'सख्याहरी' म्हणून खास ओळखलं जातं. एकूणच आठवडाभर चालणाऱ्या या उत्सवात दुसऱ्या दिवशी सांगोडोत्सव, तिसऱ्या दिवशी गरुडासन, चौथ्या दिवशी विजयरथ, पाचव्या दिवशी सिंहासन, सहाव्या दिवशी हत्तीअंबारी आणि सातव्या दिवशी शेषासन असे कार्यक्रम होणार आहेत.

शनिवारी (दि. ७ डिसेंबर) रोजी पंडित शौनक अभिषेकी यांच्या सुश्राव्य गायनाचा कार्यक्रम देखील रात्री ८ वाजता आयोजित केला आहे.

असं म्हणतात या गावात जेव्हा श्रीअंनत म्हणजेच भगवान विष्णू अवतरले तेव्हा गावकऱ्यांनी सुपारीची कोवळी झाडं घेऊन आनंदाने नाचायला सुरुवात केली होती. त्या दिवसापासून ते आजपर्यंत हा दिवस सख्याहरी म्हणून ओळखला जातो.

गावकरी या उत्सवाच्या वेळी हातात सुपारीची छोटी झाडं घेऊन वाजत-गाजत अनंताची मिरवणूक काढतात. या मिरवणुकीच्यावेळी श्रीअनंत सातेरी, शांतादुर्गा आणि नारायणाच्या मंदिरांना भेट देतात आणि परतीच्या प्रवासात गावातील सर्व घरांना आशीर्वाद दिला जातो. या संपूर्ण मिरवणुकीच्यावेळी लोकं" हरी रे माझ्या पांडुरंगा, सख्याहरी माझ्या पांडुरंगा" असा जयघोष करतात.