किट नन्हीपरी लिटील मिस इंडिया 2022 ही स्पर्धा नुकतीच गुरुवारी भुवनेश्वर ओडिसा येथे पार पडली. या स्पर्धेच्या ग्रँड फिनालेमध्ये पेडण्यातील गोमंतकीय मुलीने द्वितीय उपविजेतेपद पटकावले आहे. तर सिटी-गर्ल अयाना राउत्रे हिने किट नन्हीपरी लिटील मिस इंडिया 2022चा (KIIT NanhiPari 2022) मुकुट पटकावला.

19 ऑडिशन्समधून 15-17 वर्षे वयोगटातील 28 स्पर्धकांना हायब्रीड मोडद्वारे देशभरात झालेल्या प्रादेशिक ऑडिशन्समधून उपांत्य फेरीसाठी निवडण्यात आले. ही स्पर्धा गुरुवारी ओडिसा विद्यापीठाच्या कॅम्पसमध्ये पार पडली. या सौंदर्य स्पर्धेची ही 20 वी आवृत्ती आहे.

पेडणे तालुक्यातील साची सावंंत या किशोरवयीन युवतीने किट नन्हीपरी लिटील मिस इंडिया 2022 या स्पर्धेत द्वितीय उपविजेतेपद पटकावले आहे. तसेच मिस मोनालिसा पुरस्कार साची राजेश सावंत हीने पटकावला आहे. ग्रँड फिनालेमध्ये मेघालयच्या रायशा सहनवाज आणि गोव्याच्या साची राजेश सावंत यांना अनुक्रमे प्रथम आणि द्वितीय उपविजेतेपद पटकावले. पहिल्या तिघांना अनुक्रमे 3 लाख, १ लाख आणि 50 हजार रुपयांचे रोख पारितोषिक तसेच चांदीचा मुकुट आणि प्रमाणपत्र, ट्रॉफी प्रदान करण्यात आली. यावेळी तीने आपल्या यशाचे श्रेय तिच्या आईला दिले.

दरम्यान, पेडणे तालुक्यात कला भवनाची गरज आहे अशी खंत तिने यावेळी बोलून दाखवली. कला भवन झाल्यास पेडण्यातील कलाकारांना उभारी मिळेल. जिद्द असेल तर येथील स्थानिक कलाकार नक्कीच पुढे येतील. अशी जिद्द दाखवणारा कोणीतरी पुढे यायला हवा यासाठी पेडणेकेरांनीच प्रयत्न करायला हवेत. 18 वर्षे पुर्ण झाल्यावर मिस इंडिया स्पर्धेमध्ये सहभागी होणाच्या प्रयत्न करणार आहे असे तिने यावेळी सांगितले.