फोंडा : श्रावण महिना तीन दिवसांवर येऊन ठेपल्याने सुट्टीच्या दिवशी काल रविवारी फोंड्यात चिकन, मटण व मासे खरेदीसाठी तोबा गर्दी उसळली होती. फोंडा तसेच तालुक्यातील अन्य मासळी मार्केटमध्ये हीच स्थिती होती.

सर्वांत जास्त गर्दी चिकन स्टॉल्समध्ये दिसून आली. चिकन साधारण 180 रुपये किलो; नेट चिकन 220 रुपये किलो, मटण 1 हजार रुपये किलो; तर गावठी कोंबडी 600 ते 700 रुपये नग याप्रमाणे विकली गेली. माशांचे दरही चढेच होते. सुंगटे आकारानुसार 300 रुपये ते 600 रुपये किलो या भावाने विकली गेली. गावठी माशांनाही चांगले दर आले होते. एकंदर फोंड्यातील विविध मासळी बाजारांत पहाटेच माशांची आवक झाली होती.

शाकाहाराला प्राधान्य

राज्यात चिकन, मटणाची सर्वाधिक विक्री ही श्रावणापूर्वीच असते, असे निदर्शनास आले आहे. बरेच लोक श्रावणात शाकाहारी राहणे पसंत करत असल्याने श्रावण महिना सुरू होण्यापूर्वी शेवटच्या रविवारी किंवा बुधवारी चिकन, मटणाचा बेत केलेला असतो. त्यामुळे त्यांची विक्री मोठ्या प्रमाणात होते, असे चिकन विक्रेत्याने सांगितले.