Running car catches fire in Margao : चालत्या गाड्या पेटण्याचे गोव्यात हल्ली बरेच प्रकार घडले आहेत. त्यातच भर म्हणून आज सकाळी मडगाव जिल्हाधिकारी कार्यालयासमोर आणखी एक टाटा इंडिका गाडीने पेट घेतला. आगीत ही गाडी संपूर्ण जळून खाक झाली. सुदैवाने कारचालकाने प्रसंगावधान दाखवून गाडी रस्त्याच्या बाजूला नेऊन पार्क केल्याने त्याने स्वतःचा जीव वाचवण्यासोबतच इतरांनाही आगीच्या धोक्यापासून वाचवलं.

हा प्रकार मडगाव पणजी मुख्य रस्त्यावर घडला. या रस्त्यावर नेहमीच वाहतूक जास्त असते अशा परिस्थितीत गाडीतून धूर येऊ लागल्याने गाडी चालवत असलेल्या आशुतोष सिंग याने त्वरित आपली गाडी रस्त्याच्या बाजूला घेऊन रहदारीपासून ती दूर नेली. एवढ्यात गाडीने पूर्ण पेट घेतला. चालकाने झटपट बाहेर येत आपला जीव वाचविला.

सदर चालक पणजीहून दक्षिण गोव्यात येत असताना ही दुर्घटना घडली. ही आग नेमकी कशामुळे लागली ते कळू शकले नाही. नंतर अग्निशमन दलाने ती आटोक्यात आणली. आगीत कार जळून खाक झाली असली तरीही चालकाच्या प्रसंगावधानामुळे मोठा अनर्थ टळला आहे.