Protest Against Bhoma Highway: पणजी-बेळगाव महामार्गावर भोमा येथे होत असलेल्या रूंदीकरणाविरोधात आज, रविवारी भोमावासीय एकवटले. स्थानिकांनी या महामार्गाच्या रूंदीकरणाला विरोध करत त्यापेक्षा बायपास करा, अशी मागणी करत रॅली काढली. यावेळी क्रीडा आणि सांस्कृतिक मंत्री गोविंद गावडेंनी देखील या रॅलीला पाठिंबा दर्शवला.

पणजी आणि बेळगाव या दोन शहरांना जोडणाऱ्या महामार्गाचे रूंदीकरण करण्यात येणार आहे. तथापि, या रूंदीकरणात भोमा येथील काही घरे उद्धवस्त होऊ शकतात. त्यांना भरपाई देण्याची तयारी असली तरी संबंधित घरमालकांसह स्थानिक गावकऱ्यांचा याला विरोध आहे. त्यामुळेच त्याविरोधात आज, रविवारी याविरोधात रॅली काढण्यात आली.

'आमका जाय, आमका जाय, बायपास आमका जाय,' अशा घोषणा देत मोठ्या संख्येने या रॅलीत सहभागी झाले. यावेळी क्रीडा आणि सांस्कृतिक मंत्री गोविंद गावडे यांनी देखील या रॅलीला पाठिंबा दिला. स्थानिकांच्या बाजूने राहण्याची ग्वाही त्यांनी दिली.

मंत्री गोविंद गावडे म्हणाले की, या राष्ट्रीय महामार्गाबाबत मी २०१२ पासूनच सक्रीय आहे. तुमचा प्रश्न चर्चेतून सोडवला जाईल. राष्ट्रीय महामार्गाची काही व्यवहार्यता, तांत्रिकता, काही एक प्रक्रिया असते. मला यात राजकारण येऊ नये असे वाटते.