Bhausaheb Bandodkar: राज्याचे पहिले मुख्यमंत्री स्व. भाऊसाहेब बांदोडकर यांच्या समाधीस्थळाचे नूतनीकरण करण्यास अखेर सरकारला मुहूर्त सापडला आहे. आज सकाळी 9 वाजता या कामाची सुरवात मुख्यमंत्री डॉ. प्रमोद सावंत यांच्या हस्ते होणार आहे.

मिरामार येथे माजी मुख्यमंत्री स्व. मनोहर पर्रीकर यांचे स्मृतीस्थळ भव्य स्वरूपात आकाराला आणले जात आहे. त्याशेजारीच असलेल्या बांदोडकर यांच्या समाधीस्थळाकडे सरकारचे दुर्लक्ष होत असल्याचे जाणवत होते.

समाज माध्यमावर त्यामुळे सरकारला टीकेचा सामना करावा लागत होता. हे समाधीस्थळ कुलूपबंद ठेवू नये, असे मतही व्यक्त केले जात होते.

अखेर सरकारने भाऊसाहेबांच्या पन्नासाव्या पुण्यतिथीचे निमित्त साधून गोवा साधनसुविधा विकास महामंडळाच्या माध्यमातून या समाधीस्थळाचे नूतनीकरण करण्याचे ठरवले आहे.

मुख्यमंत्री आपल्या सहकाऱ्यांसह पुण्यतिथीनिमित्त या समाधीस्थळी जाऊन आदरांजली वाहणार आहेत. त्यानंतर दुरुस्तीच्या कामाची सुरवात केली जाणार आहे.