Goa Rain Update हवामान खात्याने दिलेल्या माहितीनुसार, गेल्या 24 तासांत या हंगामातील सर्वाधिक 146 मिलीमीटर पावसाची नोंद झाली. पणजी शहरात तर 202.9 मिलीमीटर इतका विक्रमी पाऊस झाला.

गेल्या काही महिन्यांपासून पणजीत स्मार्ट सिटीची कामे सुरू होती. या बांधकामांमुळे शहरातील गटारांमध्ये मोठ्या प्रमाणात माती आणि बांधकाम साहित्य गेल्याने ती बुजली होती.

अशा स्थितीत विक्रमी पाऊस पडल्याने गटारे तुडुंब भरून वाहू लागली. परिणामी गटारांतील पाणी रस्त्यांवर आले आणि त्याची दुर्गंधीही पसरली. सर्वत्र पूरसदृश स्थिती निर्माण झाली.

मुख्य शहरासह करंजाळे, मिरामार, सांतिनेज, भाटले, मळा, कदंब बस स्टॅण्ड परिसरातील स्थितीही भयावहच होती. यामुळे त्याचा फटका वाहतूक व्यवस्थेला बसला.

स्मार्ट सिटीची कामे योग्य रीतीने झालेली नाहीत, याबाबत नागरिकांनी यापूर्वीही तक्रारी केल्या होत्या. पाणी दुकाने, घरांमध्ये शिरल्याने स्थानिक लोकांचे मोठे नुकसान झाले.       

वाहतूक ठप्प

राज्यभर पडलेल्या मुसळधार पावसामुळे अनेक ठिकाणी रस्त्यावर पाणी आले असून अटल सेतू जवळ मिरशीकडील भागात पाणी साठल्याने इथली वाहतूक विस्कळीत झाली.

याशिवाय मळ्यातील रस्त्यावर पाणी आल्याने वाहन चालकांना या पाण्यातून रस्ता काढावा लागला, तर राजधानी पणजीतही अनेक ठिकाणी पाणी आल्याने वाहतूक थंडावली आहे.

विक्रमी पाऊस

राजधानी पणजीत गेल्या 24 वर्षांतील विक्रमी 202.9 मिलिमीटर पावसाची नोंद झाली. याचा फटका इथल्या जनजीवनालाही बसला. अनेक दुकानांसह घरांमध्ये पाणी शिरल्याने व्यावसायिकांबरोबर नागरिकांनाही याचा त्रास झाला. नुकसानीची निश्चित आकडेवारी हाती आली नसली तरी लाखोंचे नुकसान झाल्याची माहिती आहे.

40 लाख पाण्यात:-

सांत आंद्रे मतदारसंघातील सांतान चर्च येथील उतरणीवरील संरक्षक भिंत बुधवारी पहाटे कोसळली. या रस्त्यावरून मोठ्या प्रमाणात वाहतूक होत असते. सुदैवाने, या घटनेत जीवितहानी झाली नाही.

गेल्या वर्षीच या रस्त्याची दुरुस्ती तसेच डांबरीकरणाचे काम करण्यात आले होते. यासाठी सरकारने जवळपास 40 लाखांचा खर्च केला आहे. एकाच पावसात 40 लाख रुपये पाण्यात गेल्याची टीका स्थानिकांनी केली आहे.