Pissurlem : पिसुर्ले येथे गेल्या अनेक वर्षांपासून स्वच्छतेचा मंत्र जपणाऱ्या रसिका खांडेपारकर यांना केंद्रीय जलशक्ती मंत्रालयाचा कचरा व्यवस्थापनातील पुरस्कार जाहीर झाला आहे. शनिवार, 4 मार्च रोजी दिल्ली येथे राष्ट्रपती द्रौपदी मुर्मू यांच्या हस्ते हा पुरस्कार त्यांना प्रदान करण्यात येणार आहे.

सत्तरी तालुक्यासाठी हा विशेष गौरव असून हा पुरस्कार प्राप्त झाल्यामुळे पिसुर्ले पंचायत क्षेत्रासह संपूर्ण राज्यातून रसिका यांचे अभिनंदन करण्यात येत आहे. पंतप्रधान नरेंद्र मोदी यांनी देशभर स्वच्छता अभियान सुरू केले आहे.

स्वच्छतेसाठी त्यांनी वेगवेगळ्या स्तरांवर प्रोत्साहनपर उपक्रम राबविण्याचे आदेश दिले होते. त्याची दखल घेऊन यासंदर्भातील चाचपणी पंचायत खात्याने केली होती.

पिसुर्लेचे सरपंच देवानंद परब म्हणाले, या पुरस्कारामुळे पिसुर्ले पंचायतीची प्रतिष्ठा वाढली आहे. रसिका खांडेपारकर या प्रामाणिक कर्मचारी आहेत. गेल्या अनेक वर्षांपासून त्या सफाई कामगार म्हणून काम करतात.

पिसुर्लेतून अशी झाली निवड

केंद्रीय जल शक्ती मंत्रालयाच्या निर्देशानुसार पंचायत संचालनालयाने सर्व पंचायत क्षेत्रांतील सफाई कर्मचाऱ्यांचा सविस्तर अहवाल या पुरस्कारासाठी पाठवला होता.

पिसुर्लेचे सरपंच देवानंद परब यांच्या पुढाकाराने सचिव दयेश मुरगावकर यांनी पिसुर्लेत सफाई कर्मचारी म्हणून सेवा बजावणाऱ्या पणसे-सत्तरी येथील रसिका खांडेपारकर यांची निवड करून अहवाल मंत्रालयाला पाठवला होता.

त्याप्रमाणे राज्यातील सर्व अहवालांची छाननी करून रसिका यांची निवड करण्यात आली.

"मी एक गरीब सफाई कामगार आहे; मी माझी सेवा प्रामाणिकपणे बजावत आहे. प्रामाणिक सेवेचे फळ म्हणून मला पुरस्कार प्राप्त झाला आहे, याबद्दल ईश्वराचे आभार! पिसुर्ले पंचायतीनेही माझ्या कामाची दखल घेतली त्याबद्दल त्यांचीही मी ऋणी आहे."

- रसिका खांडेपारकर, पिसुर्ले.