Goa Crime News: कळंगुट येथील एका हॉटेलमध्ये एका मॉडेल तरुणीशी मैत्री करून तिला पेयात गुंगीचे पदार्थ देऊन तिच्यावर बलात्कार केल्याप्रकरणी महिला पोलिसांनी अटक केलेल्या संशियत राजेश पटनी याला आज न्यायालयाने पाच दिवसांची पोलिस कोठडी दिली.

रिअल इस्टेट क्षेत्रातील जाहिरातीसाठी संधी देण्याचे आमिष दाखवून संशयिताने हे कृत्य केल्याचे चौकशीत पुढे आले आहे. पोलिसांनी दिलेल्या माहितीनुसार पीडित तरुणी व संशयित राजेश पटनी या दोघांची वैद्यकीय तपासणी झाली आहे.

पीडितेसोबत गोव्यात मॉडेल शूटिंगसाठी आलेल्या गटातील इतर सदस्यांची जबानी नोंदवण्यात येत आहे. संशयितांची पार्श्‍वभूमी तपासून पाहण्यात येत असून अजमेर येथील पोलिसांशीही संपर्क साधण्यात आला आहे. हॉटेलमधील काही कर्मचाऱ्यांच्याही जबान्या नोंदल्या आहेत.

संशयित राजेश पटनी हा मूळचा अजमेर (राजस्थान) येथील असून गेल्या काही महिन्यांपासून तो गोव्यात व्यवसाय सुरू करण्यासाठी प्रयत्नरत होता. पीडिता ही गोव्यात मॉडेल शूटिंगसाठी आलेल्या एका गटासोबत आली होती. हा गट एका पबमध्ये रात्री पार्टीसाठी गेला असता तिथेच त्यांची ओळख झाली.

सोबत पेय घेताना संशयिताने नकळत पेयात गुंगीचे औषध घालून तिच्यावर लैंगिक अत्याचार केल्याचे पीडितेने पणजी महिला पोलिस स्थानकात दाखल केलेल्या तक्रारीत म्हटले आहे. संशयिताचा मोबाईल पीडितेला माहीत असल्याने पोलिसांनी कृत्रिम बुद्धिमत्तेच्या आधारे शोध घेऊन अटक केली. आज त्याला म्हापसा येथील प्रथमवर्ग न्यायालयात उभे केले असता पाच दिवसांची कोठडी देण्यात आली.