Goa Rain: गोव्यात गेल्या 24 तासात गडगडाटी पाऊस झाला. दरम्यान, गोव्यात आगामी तीन दिवसही पावसाचे असणार आहेत. स्कायमेट या हवामान अंदाज वर्तवणाऱ्या खासगी संस्थेने हा अंदाज वर्तवला आहे.

त्यामुळे ऐन दिवाळी सणाच्या सुरवातीला गोव्यात पाऊस असणार आहे. राज्याच्या सर्वच भागात मध्यम ते जोरदार सरी कोसळल्या. तर मध्यवर्ती भागात मुसळधार पाऊस झाला. गेल्या 24 तासांत राजधानी पणजीमध्ये 99.4 मिलीमीटर पाऊस झाला आहे.

ओल्ड गोव्यात 57 मिमी पावसाची नोंद झाली आहे. म्हापसा येथे 44 मिमी पाऊस झाला. आज, बुधवारी 08 नोव्हेंबर रोजी पावसाच्या आणखी सरी अपेक्षित आहेत. काही ठिकाणी जास्त मुसळधार सरी कोसळू शकतात. त्यानंतरचे 2 दिवस पाऊस कमी होईल.

अरबी समुद्रातील कमी दाबाच्या क्षेत्रामुळे आणि किनार्‍यावरील चक्रीवादळामुळे अवकाळी पाऊस सुरू झाला. सामान्यत: नैऋत्य मोसमी पावसाच्या माघारीनंतर अशा जोरदार सरी पडतात. गोव्यात नोव्हेंबरमध्ये सरासरी 21.3 मिमी पाऊस पडतो.

अरबी समुद्रावरील चक्रीवादळ संथ गतीने असले तरी किनार्‍यापासून दूर सरकेल. त्यामुळे आज आणि उद्या मध्यम स्वरूपाच्या पावसाची अपेक्षा आहे. त्यानंतर त्याची गती मंदावेल. 11 नोव्हेंबरपासून हवामान चांगले राहण्याची शक्यता आहे.