मडगाव: केपे तालुक्यातील बाळ्ळी परिसरात सिगारेट आणि इतर तंबाखूजन्य पदार्थ प्रतिबंधक कायद्याचे (कोटपा) उल्लंघन करणाऱ्यांविरुद्ध प्रशासनाने सोमवारी (३० मार्च) धडक मोहीम राबवली. या कारवाईत एकूण ११ आस्थापनांवर कारवाई करून त्यांच्याकडून एकूण २,२०० रुपयांचा दंड वसूल करण्यात आला आहे.

मिळालेल्या माहितीनुसार, बाळ्ळी येथील विविध सुपरमार्केट आणि किराणा दुकानांमध्ये ‘कोटपा’ कायद्याच्या कलम ४ मधील तरतुदींचे उल्लंघन होत असल्याचे पथकाच्या निदर्शनास आले. सार्वजनिक ठिकाणी नियमांचे पालन न करणाऱ्या या ११ आस्थापनांना प्रत्येकी २०० रुपयांचा दंड ठोठावण्यात आला.

कारवाई सुरूच राहणार

गोवा कॅनच्या सचिव लॉन फर्नांडिस यांनी सांगितले की, सार्वजनिक ठिकाणी तंबाखूजन्य पदार्थांच्या सेवनाला प्रतिबंध करणे आणि कायद्याची पायमल्ली करणाऱ्यांवर वचक बसवणे, हा या मोहिमेचा मुख्य उद्देश आहे. केवळ दंड वसूल करणे हा हेतू नसून नागरिकांच्या आरोग्याचे रक्षण करणे महत्त्वाचे आहे. भविष्यातही अशा प्रकारची कडक कारवाई सातत्याने सुरूच राहणार असल्याचे त्यांनी सांगितले.