Goa Youth Congress Protest: राहुल गांधी यांच्याविरोधात झालेली अन्यायकारक कारवाई, वाढलेली महागाई आणि बेरोजगारी या विरोधात युवक काँग्रेसने देशभर आंदोलन छेडले आहे. गोव्यातही त्याला प्रारंभ झाला असून, मंगळवारी मुख्यमंत्र्यांच्या पणजी-आल्‍तिनो येथील निवासस्थानी युवक काँग्रेसने काढलेला मोर्चा रोखण्यात आला.

गळ्यात बटाटे, टोमॅटोच्‍या माळा, हातात सिलिंडर घेऊन मोर्चात अनेक कार्यकर्ते दाखल झाले होते. पैकी काही जणांवर पोलिसांनी प्रतिबंधात्मक कारवाई केली.

युवक काँग्रेसच्यावतीने दुपारी आझाद मैदानावर निदर्शने करण्‍यात आली. यावेळी काँग्रेसच्या कार्यकर्त्यांनी टोमॅटो, कांदा, मिरची यांचे हार गळ्यात घातले होते, काहींनी ते हार डोक्याला बांधले होते.

भारतीय युवक काँग्रेसच्या राष्ट्रीय सचिव रिची भार्गव, विजय भिके, एहराज मुल्ला, ‘एनएसयूआय’चे नौशाद चौधरी यांच्यासह इतर कार्यकर्त्यांचा त्यात सहभाग होता.

आझाद मैदानावरून घोषणाबाजी सुरू करून मोर्चा आल्तिनोवरील मुख्यमंत्री निवासस्थानाकडे पोहोचला. महालक्ष्‍मी बंगल्‍यानजीक शंभर मीटर अंतरावर मोर्चा अडविण्‍यात आला. त्याठिकाणी युवक काँग्रेसच्या कार्यकर्त्यांनी चूल पेटवून पदार्थ तयार केले.

ते पदार्थ महागाई व बेरोजगारीच्या निषेधार्थ मुख्यमंत्र्यांना देण्यासाठी कार्यकर्ते पुढे सरसावले. पण पोलिसांनी त्‍यांना रोखले.

अच्छे दिन हेच काय?

भाजप सरकार युवकांना नोकऱ्यांचे आमिष दाखविते, बेरोजगारी वाढली आहे, त्यामुळे युवकांमध्ये संताप आहे. त्याशिवाय गोवा राज्य सरकारने तीन सिलिंडर मोफत देणार म्हणून सांगून जनतेची फसवणूक केली.

महागाई वाढत आहे, टोमॅटो 120 रुपये किलोवर पोहोचला आहे. त्यामुळे भाजप सरकारचे अच्छे दिन हेच काय? असा सवाल आंदोलनकर्त्यांनी केला.