Goa Kala Academy: आता 'त्या' कर्मचाऱ्यांवर 'एफआयआर' नोंदवा, 'कला राखण'ची अध्यक्षांकडे मागणी

पणजी: ‘नाट्य स्पर्धा निकाल निश्चितीसाठी आमिष दाखवल्याप्रकरणी त्या कर्मचाऱ्यांवर ‘एफआयआर’ नोंदवा, अशी मागणी ‘गोवा कला राखण मांड’ च्या सदस्यांनी कला अकादमीचे अध्यक्ष बाबू कवळेकर यांच्याकडे केली.

या प्रकरणाबद्दल कला अकादमीने काय उपाययोजना केल्या आहेत, हे जाणून घेण्याचा प्रयत्न या सदस्यांनी केला. कला अकादमी कशाप्रकारे त्यांची चौकशी करत यासंदर्भात सदस्यांनी अध्यक्षांना प्रश्नही विचारले. त्यावर कवळेकर यांनी हे प्रकरण कला अकादमीने गांभिर्याने घेतले असून चाैकशी सुरु असल्याचे सांगितले. 

कवळेकर म्हणाले, की त्या कर्मचाऱ्यांना कारणे दाखवा नोटीस जारी केलेली आहे. दोघांकडूनही संबंधित कामाची जबाबदारी काढून घेण्यात आली आहे. ‘त्या ’दोघांपैकी एक कर्मचारी मूळ कला आणि संस्कृती संचालनालयाचा कर्मचारी असल्याने कला आणि संस्कृती संचालनालय देखील या प्रकरणाचा एक प्रकारे भाग बनले आहे व त्यांनादेखील या प्रकरणाबद्दल कळवले आहे .

त्याचबरोबर महाराष्ट्राच्या संस्कृती कार्य कला मंडळाला पत्र लिहून त्यांच्याकडूनही माहिती मागवण्यात आली आहे. दरम्यान, अध्यक्ष कवळेकर यांनी गोवा कला राखण मांडच्या अनेक सूचनांना आज सकारात्मक प्रतिसाद दिला.‌

कर्मचाऱ्यांचा स्पर्धेत भाग नकोच

कला अकादमी आयोजित विविध स्पर्धा निष्पक्ष पद्धतीने होण्यासाठी कला अकादमीने त्यांचा पूर्वीचा नियम पुन्हा‌ लागू करून आपल्या कर्मचाऱ्यांना स्पर्धेत भाग घेण्यास मनाई करावी ही मागणीही ‘कला राखण’ ने केली आहे.

परीक्षकांना लाच देण्याचे प्रकरण अलीकडेच उघडकीस आले असले तरी परीक्षकांवर दबाव आणण्याचा प्रयत्न कर्मचाऱ्यांकडून यापूर्वीही झालेला असल्याचे लक्षात आणून देण्यात आले. आता अशा प्रकरणांवर नियंत्रण आणण्यासाठी कला अकादमीने उच्च पातळीवर एक चौकशी समिती नेमावी, अशी सूचना सदस्यांनी केली.

चौकशी समितीवर स्पर्धेपासून दूर असलेल्या ज्येष्ठ कलाकारांची नेमणूक व्हावी, जेणेकरून योग्य प्रकारे अशा प्रकरणांसंबंधी अहवाल तयार होऊ शकेल, असेही सदस्यांनी यावेळी अध्यक्षांनी सांगितले.