डिचोली: कामगार विरोधी धोरणाचा निषेध करीत आयटकशी संलग्न असलेल्या डिचोलीतील सेझा कामगारांनी आज डिचोलीत (Dicholim) निदर्शने केली. सेझा मायनिंग वर्कर्स युनियनच्या बॅनरखाली या कामगारांनी डिचोलीत सेझा खाण कंपनीच्या फाटकासमोर ही निदर्शने केली. कामगारांची पिळवणूक थांबवा. या मागणीबरोबरच तीन कृषी कायदे रद्द करण्यासाठी आंदोलन करणाऱ्या शेतकऱ्यांना या कामगारांनी पाठींबा दिला.

कृषी कायदे रद्द करण्याची मागणीही कामगारांनी केली. शेतकरी आणि कामगार वर्गावरील अत्याचार आणि सतावणुकीच्या निषेधार्थ विविध कामगार संघटनांनी आज (ता. 27) देशव्यापी 'भारत बंद' ची हाक दिली होती. या आंदोलनाला आयटकने पाठींबा जाहीर केला होता. त्याचाच भाग म्हणून आयटकशी संलग्न असलेल्या सेझा मायनिंग वर्कर्स युनियनने सिद्धेश परब, आत्माराम तिळवे आदी पदाधिकाऱ्यांच्या नेतृत्वाखाली डिचोलीत निदर्शने केली. दरम्यान, येत्या गुरुवारी (ता.30) पणजीत आझाद मैदानावर आयोजित करण्यात आलेल्या धरणे कार्यक्रमात हे कामगार सहभागी होणार आहेत.