GIDC Womens Hostel Proposal

पणजी: गोवा औद्योगिक विकास महामंडळाने (जीआयडीसी) औद्योगिक वसाहतींमध्ये काम करणाऱ्या महिलांसाठी पाच वसतिगृहे उभारण्यासाठीचा सविस्तर प्रकल्प अहवाल केंद्राला नुकताच सादर केला आहे. सार्वजनिक-खासगी भागीदारी (पीपीपी) मार्गाने औद्योगिक वसाहतींत कार्यरत महिलांसाठी पाच वसतिगृहे उभारण्याची सरकारची योजना आहे.

केंद्रीय वित्त मंत्रालयाच्या भांडवली गुंतवणूक २०२४-२५ योजनेसाठी राज्यांना विशेष सहाय्य अंतर्गत वसतिगृहे बांधण्यासाठी निधी मिळण्याची ‘जीआयडीसी‘ला आशा आहे. या प्रकल्पांचा डीपीआर (तपशीलवार प्रकल्प अहवाल) तयार करण्यात आला होता, आणि वित्त विभागाने तो जानेवारीच्या पहिल्या आठवड्यात केंद्राकडे पाठवला आहे.

‘जीआयडीसी‘ला वेर्णा येथे दोन आणि मडकई, तुये आणि कुंकळ्ळी येथे प्रत्येकी एक वसतिगृहे कार्यरत महिलांसाठी बांधायची आहेत. राज्य सरकारला आशा आहे की वसतिगृहांचा फायदा औद्योगिक क्षेत्रात, विशेषतःफार्मासी क्षेत्रात रात्रीच्या शिफ्टमध्ये काम करणाऱ्या महिलांना होणार आहे.

जीआयडीसीने केंद्राकडे या वसतिगृहासाठी शंभर कोटी रुपये मागितले आहेत. ‘जीआयडीसी’ने वसतिगृहे उभारले जाऊ शकतील, असे भूखंडदेखील निश्चित केले आहेत. वसतिगृहांची उभारणी झाल्यानंतर ते ३० वर्षांसाठी भाडेतत्वावर वसतिगृहांची देखभाल व संचालन करण्याचे कंत्राट दिले जाणार आहे. औद्योगिक वसाहतीत काम करणाऱ्या महिलांसाठी वसतिगृहे बांधल्याने अनुकूल परिसंस्था निर्माण होणार आहे. ज्यामुळे महिला श्रमशक्ती सहभाग दर (एलएफपीआर) वाढणार आहे.