खांडोळा: प्रियोळ मतदारसंघात अनेक ठिकाणी विकास कामांसाठी भूमिपूजन करण्यात आले आहे, पण फक्त भूमिपूजन, घोषणाबाजी म्हणजे विकास (Development) नव्हे. भूमिपूजन झाले, पण विकास कामांची अद्याप सुरुवात झालेली नाही. ही जनतेची फसवणूक आहे, असे मत आपचे (AAP) नेते नोनू नाईक यांनी वळवई, माशेलातील परिवर्तन यात्रेत व्यक्त केले.

प्रियोळ मतदारसंघातील (Constituency) आपचे नेते नाईक यांनी बाणास्तरी, माशेल, खांडोळा, वळवई परिसरात आपची ध्येय, धोरणे आणि मतदारसंघातील रखडलेली कामे यासंदर्भात परिवर्तन यात्रेत आढावा घेतला. त्यांच्यासमवेत आपचे नेते तथा कलाकार राजदीप नाईक व इतर कार्यकर्ते उपस्थित होते.

सर्वसामान्यांच्या विकासासाठी आम आदमीपक्ष गोव्यात (Goa) विधानसभा निवडणूक लढविणार आहे. वीज, पाणी, रस्ते या समस्या कायमच्या सोडविण्यासाठी आपचा प्रयत्न राहाणार असून युवकांना रोजगार मिळवून देणार आहे. स्वच्छ आणि भ्रष्टाचारमुक्त प्रशासनासाठी आपच देऊ शकते, असेही नाईक म्हणाले.

परिवर्तन यात्रेत केजरीवाल यांनी केलेल्या घोषणाबद्दल माहित दिली. रोजगार, बेकारी भत्ता, गृहिणींना आधार, तीर्थयात्रा, मोफत वीज, पाणी याबाबत नोंदणी करण्याचेही यावेळी आवाहन करण्यात आले.