President Droupadi Murmu Goa Visit: देशाच्या राष्ट्रपती द्रौपदी मुर्मू उद्यापासून (22 ऑगस्ट) गोवा दौऱ्यावर येत आहेत. 22 ते 24 असे तीन दिवस राष्ट्रपती मुर्मू राज्यातील विविध कार्यक्रमांना उपस्थीती लावतील.

राष्ट्रपतींच्या दौऱ्याच्या पार्श्वभूमीवर राज्यातील उच्च अधिकाऱ्यांच्या सुट्या रद्द करण्यात आल्या आहेत. त्यापाठोपाठ आता उत्तर गोव्यात या दौऱ्याच्या पार्श्वभूमीवर महत्वाचा आदेश जारी करण्यात आला आहे.

बीएसएनएलच्या वतीने उत्तर गोव्यात 20 ते 24 ऑगस्ट या कालावधीत रस्ते खोदण्यास मनाई करण्याची विनंती करण्यात आली. त्यानुसार राष्ट्रपतींचा दौरा विचारात घेता बार्देश, तिसवाडी तालुक्यात राष्ट्रीय महामार्ग, राज्य महामार्ग, जिल्ह्यातील महत्वाचे रस्ते आणि लेन्सवरती रस्ते खोदण्यास मनाई आदेश जारी करण्यात आले आहेत.

उत्तर गोवा जिल्हाधिकारी मामू हागे यांनी याबाबत आदेश दिले आहेत. आदेशाचे उल्लंघन करणाऱ्या व्यक्ती, संस्थेविरोधात 188 अंतर्गत कारवाई केली जाईल. असेही या आदेशात म्हटले आहे. 24 ऑगस्टपर्यंत आदेश लागू राहील.

दरम्यान, तीन दिवसांच्या गोवा दौऱ्यात राष्ट्रपती द्रौपदी मुर्मू गोवा विद्यापीठाच्या दिक्षांत समारंभाला हजेरी लावतील आणि विद्यार्थ्यांना संबोधित करतील. तसेच, राज्याच्या विधानसभेत देखील त्या उपस्थित राहून आमदारांना संबोधित करणार आहेत.