मडगाव : सोशल इंजिनिअरिंग करण्यात माहीर असलेल्या भाजपने गोव्यात मंत्रिमंडळ स्थापन करताना प्रत्येक समाजाला प्रतिनिधित्व देऊन खुश ठेवण्याचा प्रयत्न केला आहे. असं असलं तरीही ख्रिस्ती समाजाला तब्बल 35 टक्के प्रतिनिधीत्व देऊन त्यांच्या पदरात जरा जास्तीचेच माप टाकल्याचे स्पष्ट झाले आहे.

प्रमोद सावंत (Pramod Sawant) यांच्या मंत्रिमंडळात तिसऱ्या क्रमांकावर मॉविन गुदिन्हो हे असून निलेश काब्राल आणि बाबुश मोन्सरात यांनाही या मंत्रिमंडळात स्थान देण्यात आले आहे. याशिवाय यापुढे होणाऱ्या मंत्रिमंडळ विस्तारात या सरकारला पाठिंबा देणारे अपक्ष आमदार आलेक्स रेजिनाल्ड लॉरेन्स यांना मंत्रिपद दिल्यास या मंत्रिमंडळात ख्रिस्ती मंत्र्यांचा आकडा चारवर पोहोचणार आहे.
भाजप (BJP) सरकारमध्ये पहिल्यांदाच एवढ्या मोठ्या प्रमाणावर अल्पसंख्याक समाजाला प्रतिनिधीत्व मिळत आहे. प्रमोद सावंत यांच्या मागच्या सरकारातही पाच ख्रिस्ती मंत्री होते. मात्र त्यापैकी दोन काँग्रेसमधून फुटून भाजपात सामील झालेल्या 10 आमदारापैकी होते.

सध्या ख्रिस्ती समाज गोव्यात काँग्रेसपासून (Congress) दूर जात असताना भाजप सरकारमध्ये सध्या तीन आणि भविष्यात आणखी एक असे चार ख्रिश्चन मंत्री ठेवण्यामागे या समाजाची मते भाजपकडे वळविण्याची खेळी म्हणून पाहिले जात असून येत्या लोकसभा निवडणुकीत या समाजाचा पाठिंबा भाजप उमेदवाराला मिळण्याबरोबरच भाजप हा ख्रिश्चन विरोधी पक्ष नाही हा संदेशही देण्याचा हा एक प्रयत्न म्हणून या निर्णयाकडे पाहिले जात आहे.