गोव्याच्या मंत्रिमंडळात महिलांना 'नो एंट्री'?

पणजी : गोव्यात डॉ. प्रमोद सावंत यांनी मुख्यमंत्रिपदाची शपथ घेतली आहे. मुख्यमंत्र्यांसह 8 कॅबिनेट मंत्र्यांचाही शपथविधी सोमवारी सकाळी पार पडला. मात्र या मंत्रिमंडळात एकाही महिलेला स्थान भाजपकडून देण्यात आलेलं नाही. 11 पैकी 8 जागांसाठी मंत्र्यांचा शपथविधी झाला आहे. गोव्याच्या कॅबिनेटमध्ये अजूनही 3 जागा शिल्लक आहेत. मात्र यात मगोप आणि अपक्षांना मंत्रिपद दिलं जाण्याची शक्यता आहे.

मुख्यमंत्री डॉ. प्रमोद सावंत (Pramod Sawant) यांना राज्यपाल पी एस श्रीधरन पिल्लई यांनी पद आणि गोपनीयतेची शपथ दिली आहे. मुख्यमंत्री प्रमोद सावंत यांच्यासोबत वाळपईचे आमदार विश्वजीत राणे, मॉविन गुदिन्हो, फोंड्याचे आमदार रवी नाईक, नीलेश काब्राल, सुभाष शिरोडकर, रोहन खंवटे, गोविंद गावडे आणि अतानासिओ उर्फ बाबूश मोन्सेरात यांच्या नावाचा समावेश आहे. विश्वजीत राणेंना (Vishwajit Rane) दुसऱ्या क्रमांकाचं महत्त्वाचं पद मिळण्याची शक्यता आहे.

गोव्यात सध्या भाजपच्या (BJP) दोन महिला आमदार आहेत. या दोघीही मंत्रिपदाच्या प्रबळ दावेदार मानल्या जात होत्या. यात जेनिफर मोन्सेरात यांनी मागील सरकारमध्ये मंत्रिपद भूषवलं होतं. मात्र यावेळी त्यांचं मंत्रिपद राहील की जाईल अशी चर्चा सुरु होती. दुसरीकडे विश्वजीत राणेंच्या पत्नी दिव्या राणेंनी राजकीय पदार्पणातच मोठ्या मताधिक्याने पर्ये मतदारसंघातून निवडणुकीत विजय मिळवला होता. मात्र या दोन्ही महिला आमदारांमधील चुरस पाहता भाजपने दोघींनाही डच्चू दिल्याचं चित्र आहे. मंत्रिमंडळ विस्तारात मगोपच्या सुदिन ढवळीकरांसह अपक्ष आमदार आलेक्स रेजिनाल्ड लॉरेन्स आणि डॉ. चंद्रकांत शेट्ये यांना स्थान दिलं जाण्याची शक्यता आहे.